ކެޕޭސިޓީ ބިލްޑިންގ ޕްރޮގްރާމެއް ސިޓީސް މިނިސްޓްރީން ފަށައިފި

ކެޕޭސިޓީ ބިލްޑިންގ ޕްރޮގްރާމެއް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގައި ފަށައިފިއެވެ.

މިއަދު މެންދުރުފަހު ސްޓެލްކޯގެ އޮޑިޓޯރިއަމްގައި ބޭއްވި ޚާއްޞަ ރަސްމިއްޔާތެއްގައި މި ޕްރޮގްރާމް ފައްޓަވައި ދެއްވީ މިނިސްޓަރ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރެވެ.

މިއީ މިނިސްޓަރ އާދަމް ޝަރީފްގެ އެދިވަޑައިގަތުމަކަށް، ސިވިލް ސަރވިސް ކޮމިޝަނުން ކުރިއަށް ގެންގޮސްދޭ ޕްރޮގްރާމެއް ކަމަށް މިނިސްޓްރީ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވާރކްސްއިން ބުނެފައިވެއެވެ.

ކެޕޭސިޓީ ބިލްޑިންގ ޕްރޮގްރާމުގެ ނަމުގައި މިއަދު ފެށި މި ޕްރޮގްރާމުގެ މިއަދުގެ ދަންފަޅި ހިނގަމުންދަނީ ސްޓެލްކޯގެ އޮޑިޓޯރިއަމުގައި ކަމަށް ވިޔަސް މާދަމާއިން ފެށިގެން ދަންފަޅިތައް ކުރިއަށް ގެންދިޔުމަށް ހަމަޖެހިފައި ވަނީ ސިވިލް ސަރވިސް ކޮމިޝަންގެ އޯކިޑު މާލަމުގައާއި، މިނިސްޓްރީގެ ޕަބްލިކް ވަރކްސް ޑިޕާޓްމެންޓްގައި ކަމަށް މިނިސްޓްރީން ވަނީ ބުނެފައެވެ.

މި ޕްރޮގްރާމު ޚާއްޞަކޮށްފައިވަނީ މިނިސްޓްރީގައި ވަޒީފާ އަދާ ކުރާ މަދަނީ މުވައްޒަފުންނަށެވެ. ޕްރޮގްރާމު ފެށުމަށް ބޭއްވި ރަސްމިއްޔާތުގައި ސިވިލް ސަރވިސް ކޮމިޝަންގެ ރައީސާއި، މިނިސްޓްރީގެ އިސްވެރިން ބައިވެރިވެވަޑައިގެންނެވިއެވެ.

މިއަދުން ފެށިގެން 2 ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމަކީ މިގޮތުން ހިންގާ ފުރަތަމަ ޕްރޮގްރާމްކަމުގައިވެސް މިނިސްޓްރީން ވަނީ ބުނެފައެވެ.

މިއަދު ފެށި މި ޕްރޮގްރާމުގެ ސެޝަންތައް މި ހަފުތާގެ ބުރާސްފަތި ދުވަހުގެ ނިޔަލަށް ކުރިއަށް ދާނެ ކަމަށާއި ސެޝަންތައް އޮންނާނީ މެންދުރުފަހު ކަމުގައިވެސް ވަނީ ބުނެފައެވެ. ސިޓީސް މިނިސްޓްރީން އަންނަނީ މުވައްޒަފުން ތަމްރީންކުރުމަށް ޓަކައި ތަފާތު ޕްރޮގްރާމުތައް ހިންގަމުންނެވެ.