ހަނިމާދުއާއި އިހަވަންދޫގައި ފިއުލް ސްޓޭޝަންގެ ޚިދުމަތް ފަށައިފި

ހދ. ހަނިމާދުއާއި ހ.އ. އިހަވަންދޫގައި ފިއުލް ސަޕްލައި މޯލްޑިވެސް (އެފްއެސްއެމް) އިން ތެޔޮ ސްޓޭޝަންތައް ގާއިމުކޮށް، އެ ތަންތަނުން މިހާރު ވަނީ ޚިދުމަތް ދޭން ފަށާފައެވެ.

2024 ވަނަ އަހަރުގެ ނޮވެމްބަރު މަހު ފެށި މި މަޝްރޫއުގެ ދަށުން ރާއްޖޭގެ 18 ރަށެއްގައި ފިއުލް ސްކިޑް ބެހެއްޓުމަށް އެސްޓީއޯއިން ވަނީ ނިންމާފައެވެ. މީގެ މައިގަނޑު މަގުސަދަކީ މަސްވެރިންނަށާއި އާންމު ރައްޔިތުންނަށް ހެޔޮ އަގުގައި ފަސޭހަކަމާއެކު ތެޔޮ ލިބޭނެ އިންތިޒާމު ހަމަޖެއްސުންކަމަށް އެސްޓީއޯއިން ބުނެފައިވެއެވެ.

މި މަޝްރޫއުގެ ދަށުން އެންމެ ފުރަތަމަ ފިއުލް ސްކިޑް ހުޅުވީ މިދިޔަ ޑިސެމްބަރު މަހު ރ. ދުވާފަރުގައެވެ. އަދި މިހާރު އިހަވަންދުއާއި ހަނިމާދޫގައި ޚިދުމަތް ދޭން ފެށުމާއެކު، އެ ރަށްރަށުގެ ރައްޔިތުންނަށް ރަށުން ބޭރަށް ނުގޮސް، ރައްކާތެރިކަމާއެކު އާންމު އަގުތަކުގައި ތެޔޮ އެޅޭނެ މަގު ވަނީ ތަނަވަސްވެފައެވެ.

މަސްވެރިންނަށް ޚާއްސަކޮށްގެން ކުރިއަށްގެންދާ މި މަޝްރޫއުގެ 78 އިންސައްތަ މަސައްކަތް މިހާރު ވަނީ ނިމިފައެވެ. އެސްޓީއޯއިން ލަފާކުރާ ގޮތުގައި ކުރިއަށް އޮތް ތިން މަސްދުވަހުގެ ތެރޭގައި މުޅި މަޝްރޫއު އެއްކޮށް ނިންމާލެވޭނެއެވެ.

މާލޭގެ އިތުރުން މިހާރުވެސް އެފްއެސްއެމްގެ ޚިދުމަތް އައްޑޫ ސިޓީގެ ގަމާއި ހުޅުމީދޫ، ފުވައްމުލައް، ކޫއްޑޫ، ތިނަދޫ އަދި ފެލިވަރުގައި ދަނީ ފޯރުކޮށްދެމުންނެވެ.