ހަނގުރާމަ ހުއްޓުވަން ހުށަހެޅި ގަރާރު ނާކާމިޔާބުކޮށްލައިފި

މެދުއިރު މަތީގައި ފަށާފައިވާ ހަނގުރާމަ އާއި ގުޅިގެން ހަނގުރާމަ ހުއްޓުވަން އެމެރިކާގެ ޤާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްއަށް ހުށަހެޅި ޤަރާރު ނާކާމިޔާބު ކޮށްލައިފިއެވެ.

ޓްރަމްޕްގެ ހަނގުރާމަ ހުއްޓުވުމަށް ޤަރާރު ހުށަހަޅުއްވާފައި ވަނީ އިދިކޮޅު ޑިމޮކްރެޓިކް ޕާޓީގެ މެންބަރުންނެވެ. މި ޤަރާރު ފޭލުވެފައި ވަނީ ހައުސްގެ 219 މެންބަރުންގެ ވޯޓުންނެވެ. ހަނގުރާމައާ ދެކޮޅަށް ވޯޓުދެއްވީ 212 މެންބަރުންނެވެ.

ޓްރަމްޕްގެ ރިޕަބްލިކަން ޕާޓީގެ ދެ މެންބަރަކުވެސް ވަނީ ޓްރަމްޕާ ދެކޮޅަށް ވޯޓުދީފަ އެވެ. ނަމަވެސް ބާކީ ތިބި އެންމެންވެސް ވަނީ ޓްރަމްޕާއި އެއްކޮޅަށް ވޯޓުދީފަ އެވެ.

ޑިމޮކްރެޓުންގެ ތެރެއިން ވެސް ހަތަރު މެންބަރަކު ވަނީ، ޕާޓީގެ ވިސްނުމާ ދެކޮޅަށް، ހަނގުރާމަ ކުރިއަށް ގެންދިޔުމަށް ތާޢީދުކޮށް ވޯޓު ދެއްވާފައެވެ.

ޤަރާރުގެ ފަހަތުގައި ތިއްބެވި މެންބަރުން ވަނީ ޤަރާރު ދިފާޢު ކުރައްވާފައެވެ. އެ މެންބަރުން ވިދާޅުވީ، މިއީ ޤާނޫނުއަސާސީން އެމެރިކާގެ ޤާނޫނު ހަދާ މަޖިލިސް، ކޮންގްރެސްއަށް މަތިކޮށްފައިވާ ޒިންމާއާއި ބާރުތައް އަނބުރާ ހޯދުމަށް ހުށަހެޅި ޤަރާރެއް ކަމުގައެވެ.

ފެބުރުވަރީ 28ވަނަ ދުވަހު، ކޮންގްރެސްގެ ހުއްދައާ ނުލައި ޓްރަމްޕް އިސްވެ، ޔަހޫދީންނާ ގުޅިގެން ފެށްޓެވި ހަނގުރާމައިގައި ޝަހީދު ކޮށްލާފައިވާ އީރާންގެ ރައްޔިތުންގެ އަދަދު ވަނީ 1,230އަށް އުފުލިފައެވެ.