14 ދުވަސް ފަހުން އެމްޑީޕީގެ އެކްޓިވިސްޓް ޝާމިން ދޫކޮށްލައިފި

މުޒާހަރާއަކާ ގުޅިގެން ހައްޔަރުކޮށް ބަންދުގައި ބެހެއްޓުމަށްފަހު، 14 ދުވަސް ފަހުން އިދިކޮޅު އެމްޑީޕީގެ އެކްޓިވިސްޓް މުހައްމަދު ޝާމިން ބަންދުން ދޫކޮށްލައިފިއެވެ.

ކޯޓު އަމުރެއްގެ ދަށުން ފުލުހުން ޝާމިން ހައްޔަރުކޮށްފައިވަނީ މި ސެޕްޓެމްބަރު މަހުގެ 08 ވަނަ ދުވަހު އެވެ.

ޝާމިން ހައްޔަރުކުރީ އެ ދުވަހުގެ 11 ދުވަސް ކުރިން، މާލޭގައި އިދިކޮޅު ފަރާތްތަކުން ބޭއްވި މުޒާހަރާއެއްގެ މައްސަލައިގައެވެ.

ޝާމިން ހައްޔަރު ކުރުމަށް ނެރުނު ކޯޓު އަމުރުގައިވާ ގޮތުން، އޭނާ ހައްޔަރުކޮށްފައި ވަނީ މިދިޔަ އޮގަސްޓު މަހުގެ 28 ވަނަ ދުވަހު އެމްޑީޕީން ބޭއްވި އެއްވުމުގައި ފުލުހުންގެ ދައުރު އަދާކުރުމަށް ހުރަސް އަޅައި، މަގު ބަންދުކުރުމަށް ފުލުހުން ޖަހާފައި ހުރި ބެރިކޭޑުތައް ހުރަސްކުރި ކަމުގެ ތުހުމަތުގައެވެ.

ހައްޔަރުކުރުމަށްފަހު ޝާމިންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ފުރަތަމަ އަމުރުކުރީ އޭނާ 10 ދުވަހަށް ބަންދުގައި ބެހެއްޓުމަށެވެ. އަދި އެ މުއްދަތު ހަމަވުމުން ކޯޓަށް ހާޒިރުކުރުމުން، ދެވަނަ ފަހަރަށް ވަނީ ބަންދުގެ މުއްދަތު 4 ދުވަހަށް އިތުރުކޮށްދީފައެވެ.

ޝާމިން ހައްޔަރުކޮށް ބަންދުގައި ބެހެއްޓުމާ ގުޅިގެން އެމްޑީޕީންނާއި އޭނާއަށް ތާއީދުކުރާ ފަރާތްތަކުން ވަނީ އޭނާ ވަގުތުން ދޫކޮށްލުމަށް ގޮވާލައި މީސްމީޑިއާގައި އަޑުއުފުލައި، ކަންބޮޑުވުން ފާޅުކޮށްފައެވެ. ޝާމިން ދޫކޮށްލާފައި މިވަނީ އޭނާގެ ބަންދަށް ދިން 14 ދުވަހުގެ މުއްދަތު ހަމަވުމުންނެވެ.