ޑިސްޓްރިބިއުޝަން ފޮށިތަކުގައި ޕޯސްޓަރު ހަރުނުކުރަން ސްޓެލްކޯއިން އެދިއްޖެ

ސްޓެލްކޯގެ ސަބްސްޓޭޝަން އިމާރާތްތަކުގެ ފާރުތަކާއި، ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކަރ ހަރުނުކުރުމަށް އެކުންފުނިން އެދިއްޖެއެވެ.

ސްޓެލްކޯއިން ބުނީ، އެކުންފުނިން ޚިދުމަތްދޭ އިމާރާތްތަކާއި، ސަބްސްޓޭޝަން ޢިމާރާތްތަކުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި އެކި ފަރާތްތަކުން ޕޯސްޓަރު، ސްޓިކަރ ފަދަ ތަކެތި ތަތްކުރަމުންދާކަން ފާހަގަކުރެވިފައިވާކަމަށެވެ. އަދި މިކަމުގެ ސަބަބުން ޑިސްޓްރިބިއުޝަން ފޮށި ހުޅުވާ، މެއިންޓެއިން ކުރުމަށް ދަތިތައް ދިމާވަމުންދާކަމަށް ސްޓެލްކޯއިން ބުންޏެވެ.

ސަބްސްޓޭޝަން ޢިމާރާތްތަކުގެ ބޭރުގައި ހަރުކޮށްފައިވާ އިންޒާރު ނުވަތަ ނުރައްކާ ބޯޑުތަކުގެ މަތީގައި ސްޓިކަރ އަދި ޕޯސްޓަރ ތަތްކުރުމުގެ ސަބަބުން ރައްކާތެރިކަމާއެކު ދެމެހެއްޓެނެވި ގޮތެއްގައި ކަރަންޓުގެ ޚިދުމަތް ދިނުމަށް ސްޓެލްކޯއިން ކުރަމުންދާ މަސައްކަތްތަކަށް ހުރަސް އެޅެމުންދާކަންވެސް އެކުންފުނިން ވަނީ ފާހަގަކޮށްފައެވެ.

އެހެންވެ، ޚިދުމަތްދޭ ޢިމާރާތްތަކާއި، ސަބްސްޓޭޝަންތަކުގެ ޢިމާރާތުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި ޕޯސްޓަރ، ސްޓިކަރ އަދި މިނޫނަސް އެއްވެސް އެއްޗެއް ތަތްނުކުރުމަށް ސްޓެލްކޯއިން ވަނީ އެދިފައެވެ.