ވުލްވްސް ބަލިކޮށް އެފްއޭކަޕްގެ ކުއާޓާ ފައިނަލުގެ ޖާގައެެއް ލިވަޕޫލުން ކަށަވަރުކޮށްފި

އިނގިރޭސި އެފްއޭކަޕްގެ ފަސްވަނަ ބުރުގައި ރޭ ރަށުން ބޭރުގައި ވުލްވްސް އާއި ދެކޮޅަށް ކުޅުނު މެޗު 3-1 ގެ ނަތީޖާއަކުން ކާމިޔާބުކޮށް ލިވަޕޫލުން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގެ ފަސްވަނަ ބުރުން ލިވަޕޫލް ޖާގަހޯދި ހަތަރުވަނަ ބުރުގައި ބްރައިޓަން 3-0 ގެ ނަތީޖާއަކުން ބަލިކުރުމަށްފަހު އެވެ. އަދި ވުލްވްސް މުބާރާތުގެ ފަސްވަނަ ބުރުން ޖާގަހޯދީ ހަތަރުވަނަ ބުރުގައި 1-0 ގެ ނަތީޖާއަކުން ތިންވަނަ ޑިވިޝަންގެ ގްރިމްސްބީ ބަލިކުރުމަށްފަހު އެވެ. އަދި މިދެޓީމު އެންމެ ފަހުން ކުޅުނު މެޗު 2-1 ގެ ނަތީޖާއަކުން ކާމިޔާބުކުރީ ވުލްވްސް އިންނެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ލިވަޕޫލުން މެޗު ޑޮމިނޭޓްކުރިއިރު، މިހާފުގައި އެޓީމުން ވުލްވްސްގެ ގޯލަށް 11 ހަމަލާ ފޮނުވާލި ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެެގެންނެވެ.

މެޗުގެ ދެވަނަ ހާފުގައި ލިވަޕޫލުން އެޓީމުގެ އެޓޭކުތައް އިތުރަށް ވަރުގަދަކުރިއިރު. މިހާފުގައި އެޓީމުން ވަނީ ތިން ލަނޑު ކާމިޔާބުކޮށްފައެވެ. އެގޮތުން އެޓީމުގެ ފުރަތަމަ ލަނޑު ދެވަނަ ހާފުގެ 51 ވަނަ މިނެޓުގައި ޑިފެންޑަރު އެންޑްރޫ ރޮބަޓްސަން ކާމިޔާބުކުރިއިރު، އޭގެ ދެމިނެޓް ފަހުން އެޓީމުގެ ލީޑު ފުޅާކޮށްދިނީ މުހައްމަދު ސަލާހް އެވެ.

މިމެޗުގައި ލިވަޕޫލުގެ ތިންވަނަ ލަނޑު ދެވަނަ ހާފުގެ މެޗުގެ 71 ވަނަ މިނެޓުގައި މިޑްފީލްޑަރު ކާޓިސް ޖޯންސް ކާމިޔާބުކުރިއިރު، މެޗުގެ އިތުރު ވަގުތުގެ ތެރޭގައި ވުލްވްސްއަށް ނަތީޖާގެ ފަރަގު ކުޑަކޮށްދިނީ ފޯވާޑް ހީ ޗަންގް ހުވާންގް އެވެ. އަދި މިލަނޑާއެކު މެޗުގެ ކުޅުނަ ނިމިގެންދިޔައީ 3-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.