ޕީއެެސްޖީ ބަލިކޮށް މޮނާކޯ އިން ބަދަލުހިފައިފި

ފްރާންސް ލީގުގައި މިރޭ ރަށުން ބޭރުގައި ޕީއެސްޖީ އާއި ދެކޮޅަށް ކުޅުނު މެޗު 3-1 ގެ ނަތީޖާއަކުން ކާމިޔާބުކޮށް މޮނާކޯ އިން ތާވަލުގެ ފަސްވަނައަށް ކުރިއަށް ޖެހިލައިފިއެވެ.

ލީގުގައި މޮނާކޯ އެންމެ ފަހުން ކުޅުނު މެޗުގައި ލު ހާވާރ އަތުން 1-0 ގެ ނަތީޖާއަކުން މޮޅުވެފައިވާއިރު، ލީގުގައި މޮނާކޯ އެންމެ ފަހުން ކުޅުނު މެޗުގައި އެޓީމުން ވަނީ އެންގާރސް ބަލިކޮށްފައެވެ. އަދި މިދެޓީމު އެންމެ ފަހުން ޗެމްޕިއަންސް ލީގު ޕްލޭއޮގައި ވާދަކުރިއިރު، 5-4 ގެ އެގްރިގޭޓް ނަތީޖާއަކުން މޮޅުވެ މުބާރާތުގެ ދެވަނަ ބުރުން ޖާގަ ހޯދީ ޕީއެސްޖީ އިންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ މޮނާކޯ އިންނެވެ. މިލަނޑު ފުރަތަމަ ހާފުގެ 27ވަނަ މިނެޓުގައި ކާމިޔާބުކޮށްދިނީ ފޯވާޑް މަގްނޭސް އަކްލިއުޗް އެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 55 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އެލްގްޒެންޑަރ ގޮލޮވިން އެވެ.

ޕީއެސްޖީ އިން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ 71 ވަނަ މިނެޓުގައި ފޯވާޑް ބްރެޑްލީ ބާކޯލާ ކާމިޔާބުކުރިއިރު. އޭގެ ދެމިނެޓް ފަހުން މޮނާކޯގެ ފްލޮރިއަން ބޮލޮގަން ވަނީ އިތުރު ލަނޑެއް ކާމިޔާބުކޮށް އަލުން އެޓީމަށް ދެލަނޑުގެ ލީޑެއް ހޯދައިދީފައެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން މޮނާކޯ ކުރީގައި އޮވެގެންނެވެ.

މިނަތީޖާއެކު ލީގުގައި ކުޅުނު 25 މެޗުން މޮނާކޯއަށް 40 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލަނޑުގެ ތަފާތުން ތާވަލުގެ ފަސްވަނައިގައެވެ. އަދި މިމެޗުން ބަލިވި ޕީއެސްޖީ އިން ލީގުގައި ކުޅުނު 25 މެޗުން ހޯދި 57 ޕޮއިންޓާއެކު އެޓީމު މިވަގުތު އޮތީ ތާވަލުގެ އެއްވަނައިގައެވެ.