މިދިޔަ އަހަރު 148 ޓީބީ ކޭސް ރިޕޯޓުކޮށްފައިވޭ

މިދިޔަ އަހަރު އެކަނި ވެސް ރާއްޖެ އިން ޓީބީގެ 148 ކޭސް ރިޕޯޓުކޮށްފައިވާ ކަމަށް އެޗްޕީއޭ އިން ބުނެފި އެވެ.

މާޗު މަހުގެ 24 ވަނަ ދުވަހަކީ ދުނިޔޭގެ ޓީބީ ދުވަހުގެ ގޮތުގައި ފާހަގަކުރާ ދުވަހެވެ. އެ ދުވަހާ ގުޅިގެން އެޗްޕީއޭއިން ނެރުނު ރިޕޯޓުގައިވާގޮތުން 2024 ވަނަ އަހަރު އެކަންި ވެސް ރާއްޖެއިން 148 ކޭސް ރިޕޯޓުކޮށްފައިވާ ކަމަށެވެ.

މުޅި ދުނިޔޭގެ ތަފާސްހިސާބުތަކަށް ބަލާއިރު، ދުނިޔޭގެ ސިއްހަތު ޖަމިއްޔާގެ 2023 ވަނަ އަހަރުގެ ތަފާސްހިސާބުތަކުން ދައްކާގޮތުން ޓީބީ ބަލީގައި ދުނިޔެއިން 1.2 މިލިއަން މީހުން މަރުވެފައިވާ ކަމަށް ބުނެފައިވެ އެވެ. އަދި 2023 ވަނަ އަހަރު ދުނިޔެއިން 20.8 މިލިއަން މީހުންނަށް ބަލި ޖެހިފައިވާ ކަމަށް ބަޔާންކޮށްފައިވެ އެވެ.

އެ ރިޕޯޓުގައިވާގޮތުން އޭގެ ތެރޭގައި ހިމެނެނީ 6 މިލިއަން ފިރިހެނުންނާއި 3.6 މިލިއަން އަންހެނުންނެވެ. އަދި 1.3 މިލިއަން ކުޑަކުދިން ހިމެނެ އެވެ.

ޓީބީ ބަލި ޖެހުމުގެ ފުރުސަތު އެންމެ ބޮޑީ ދިގު މުއްދަތަށް ބޭސްފަރުވާކުރަމުންދާ ފަރާތްތައް އަދި ހަށިގަންޑުގެ ދިފާއީ ނިޒާމު ބަލިކަށިވެފައިވާ މީހުންނަށެވެ. މިސާލަކަށް ހަކުރުބަލި، ކެންސަރު ބަލި، ހަށިގަނޑުގެ ގުނަވަނެއް ބަދަލުކޮށްފައިވާ މީހުން ހިމެނެ އެވެ.

މީގެ އިތުރަށް ބީސީޖީ ވެކްސިން ފުރިހަމަ ނުވާ 5 އަހަރުން ދަށުގެ ކުދިންނާއި ދުންފަތުގެ އިސްތިއުމާްލުކުރާ މީހުންނާއި އުމުރުން ދުވަސްވީ މީހުންނަށް ވެސް މި ބަލި ޖެހުމުގެ ފުރުސަތު ބޮޑެވެ.

މި ބަލި ޖެހިއްޖެ މީހެއްގެ ގައިން ފެންނާނެ އަލާމާތްތަކަށް ބަލާއިރު ކުއްލިއަކަށް ހަށިގަނޑުގެ ބަރުދަން ލުއިވުން، ވަރުދެރަވުން ހީކެރުވުން އަދި އާދަޔާ ހިލާފަށް ދާހިއްލުމާއި، ހުންއައުން އަދި މޭގައި ރިއްސުމާއި ކެއްސާފައި އަންނަ ދަވާގައި ލޭ ހުރުން އަދި 2 ހަފްތާއަށް ވުރެ ގިނަ ދުވަސްވަންދެން ކެއްސުން ހިމެނެ އެވެ.

މި ބަލިން ރައްކާތެރިވުމަށް އެޅިދާނެ ފިޔަވަޅުތަކުގެ ތެރޭގައި ޓީބީ ޖަރާސީމު ހުރިކަން ނުވަތަ ނޫންކަން ޔަގީން ކުރުމަށް ޓީބީއަށް ޓެސްޓްކޮށް އަވަހަށް ފަރުވާ ހޯދުމާއި، ކެއްސާ ކިނބިހި އަޅާ އިރު އަނގަޔާއި ނޭފަތް ރަނގަޅަށް ނިވާކުރުން ހިމެނެ އެވެ. އަދި ތަންތަނަށް ކުޅު ނުޖެހުމާއި ބަލި ޖެހިފައިވާ މީހަކު ދިރިއުޅޭ ނަމަ ގޭގައި ރަނގަޅަށް ވައި ދައުރުވާހެން ބެހެއްޓުން ހިމެނެ އެވެ.

ޓީބީ އަކީ މައިކޯބެކްޓީރިއަމް ޓިއުބަކްލޯސިސް ކިޔާ ބެކްޓީރިއާއެއްގެ ސަބަބުން ޖެހޭ ބައްޔެކެވެ. މި ބަލި އެންމެ އާންމުކޮށް ޖެހެނީ ފުއްޕާމެއަށެވެ. އެހެން ގުނަވަންތަކަށް މި ބަލި ޖެހުނުކަމުގައިވީ ނަމަވެސް، މި ބަލި ގައިން ގަޔަށް ފެތުރެނީ ހަމައެކަނި ފުއްޕާމެއަށް ޓީބީ ޖެހި ކުޅުގައި ޖަރާސީމު ހުންނަ ބަލި މީހުންގެ ފަރާތުންނެވެ.

މި ބަލިން ރައްކާތެރިވުމަށް އެޅިދާނެ ފިޔަވަޅުތަކުގެ ތެރޭގައި ޓީބީ ޖަރާސީމު ހުރިކަން ނުވަތަ ނޫންކަން ޔަގީން ކުރުމަށް ޓީބީއަށް ޓެސްޓްކޮށް އަވަހަށް ފަރުވާ ހޯދުމާއި، ކެއްސާ ކިނބިހި އަޅާ އިރު އަނގަޔާއި ނޭފަތް ރަނގަޅަށް ނިވާކުރުން ހިމެނެ އެވެ. އަދި ތަންތަނަށް ކުޅު ނުޖެހުމާއި ބަލި ޖެހިފައިވާ މީހަކު ދިރިއުޅޭ ނަމަ ގޭގައި ރަނގަޅަށް ވައި ދައުރުވާހެން ބެހެއްޓުން ހިމެނެ އެވެ.