ސުޕަރ މެޖޯރިޓީއާއެކު ނިޒާމުގެ ބާރުތައް ކެނޑިއްޖެ، ވިސްނަން ޖެހޭ: ފައްޔާޒު

ރައްޔިތުންގެ މަޖިލީހުގެ ސުޕަ މެޖޯރިޓީ ސަރުކާރު ހިންގާ ޕާޓީއަށް ލިބުމުން، ދައުލަތުގެ ބާރުތައް ވަކިވެފައި އޮންނަ އޮތުމާއި "ޗެކްސް އެންޑް ބެލެންސް" ނިޒާމު އެއްކޮށް ފެއިލްވެފައިވާ ކަމަށާއި، މިހާރު އޮތް ވެރިކަމުގެ ނިޒާމީ އިންތިޒާމާ މެދު އަލުން ވިސްނަން ޖެހިފައިވާ ކަމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކުރީގެ ޗެއާޕާސަން ފައްޔާޒް އިސްމާއީލް މިއަދު ވިދާޅުވެއްޖެއެވެ.

ފައްޔާޒު މިހެން ވިދާޅުވީ އެމްޑީޕީން ތިން ދުވަހުގެ މުއްދަތަށް ކުރިއަށްގެންދާ އެ ޕާޓީގެ 5 ވަނަ ކޮންގްރެސްގައި ވާހަކަދައްކަވަމުންނެވެ.

އޭނާ ވިދާޅުވީ، 2008 ވަނަ އަހަރު އަމަލުކުރަން ފެށި އާ ގާނޫނުއަސާސީން ދައުލަތުގެ ތިން ބާރު ވަކިކުރިއިރު އުންމީދު ކުރެވުނީ ރައްޔިތުންގެ މަޖިލީހަކީ ގާނޫނުއަސާސީ ނަގަހައްޓައި، ރައްޔިތުންގެ ހައްގުތައް ހިމާޔަތްކޮށް، ސަރުކާރު ޖަވާބުދާރީ ކުރުވައި އޮބަހައްޓާނެ ފަރާތެއްގެ ގޮތުގައި ކަމަށެވެ. ނަމަވެސް، ޑިމޮކްރަސީ ގަބޫލުނުކުރާ ބަޔަކަށް ވެރިކަން ލިބޭ ކޮންމެ ފަހަރަކު މުޅި ނިޒާމު އެއްކޮށް ގަނޑުބަނޑުކޮށްލާ މަންޒަރު ފެންނަމުންދާ ކަމަށް އޭނާ ފާހަގަކުރެއްވިއެވެ.

ފައްޔާޒު ވިދާޅުވި ގޮތުގައި ޕީއެންސީގެ ސަރުކާރުން މަޖިލީހުގެ ސުޕަ މެޖޯރިޓީ ނަގައި، ގާނޫނުއަސާސީގެ ހުރިހާ ޗެކްސް އެންޑް ބެލެންސަސްގެ މަފްހޫމްތައް ވަނީ ދުއްވާލާފައެވެ. އަދި މިހާރު ފެންނަނީ ރައްޔިތުންގެ ހައްގުތަކުގެ ބަދަލުގައި ވެރިމީހާގެ ހައްގުތަކެއް އޮންނަތަން ކަމަށްވެސް އޭނާ ވިދާޅުވިއެވެ.

މިހާރު ކަންކަން ހަމަޖެހިފައިވާ ގޮތުން ރައީސުލްޖުމްހޫރިއްޔާއަށް ގިނަ ބާރުތަކެއް ލިބިވަޑައިގަންނަވާކަން ފާހަގަކުރައްވައި ފައްޔާޒު ވިދާޅުވީ، ހާއްސަކޮށް ރައްޔިތުންގެ މަޖިލީހުގެ އަޣުލަބިއްޔަތު ލިބިއްޖެނަމަ، އެއްވެސް ހުރަހެއްނެތި ރައީސުލްޖުމްހޫރިއްޔާ ބޭނުންފުޅު ގޮތަކަށް އަމަލުކުރެއްވުމުގެ ފުރުސަތު އޮންނަ ކަމަށެވެ.

މި މައްސަލައަށް ހައްލެއް ހޯދުމުގެ ގޮތުން ފައްޔާޒު ވަނީ ވެރިކަމުގެ ނިޒާމަށް އިސްލާހީ ބަދަލުތަކެއް ގެނައުމަށް ހުށަހަޅުއްވާފައެވެ. އެގޮތުން ސަރުކާރުގެ ބާރުތައް ކުޑަކޮށް، ދައުލަތާއި ސަރުކާރު ވަކި ދެ ކަމެއްގެ ގޮތުގައި ބަހާލައި، ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިކުރުމުގެ ވިސްނުން އޭނާ ހިއްސާކުރެއްވިއެވެ.

މިއީ ބަރުލަމާނީ ނިޒާމެއް ނޫންކަން ސާފުކޮށްދެއްވަމުން ފައްޔާޒު ވިދާޅުވީ، ސަރުކާރުގެ ވެރިޔާ އަދިވެސް ހޮވާނީ ރައްޔިތުންގެ ސީދާ ވޯޓަކުން ކަމަށެވެ. އަދި ސަރުކާރުގެ ވެރިޔާ ހުށަހަޅާ ކެބިނެޓަށް މަޖިލީހުގެ ރުހުން ލިބިގެން ސަރުކާރު އުފެދޭއިރު، ދައުލަތުގެ ވެރިޔާ އަކީ މަޖިލީހުން ނުވަތަ ބޮޑު މަޖިލީހަކުން އައްޔަންކުރާ ފަރާތަކަށް ހެދިދާނެ ކަމަށް އޭނާ ވިދާޅުވިއެވެ.

ފައްޔާޒު ވަނީ މި ހުށަހެޅުމަކީ ބަރުލަމާނީ ނިޒާމަކަށް ބަދަލުވުން ނޫން ކަމަށާއި، ގަސްތުގައި ވިޔަސް ނުވަތަ އޮޅިގެން ވިޔަސް އެ ވާހަކަ އޮޅުވާނުލުމަށް ކޮންގްރެސްގެ ބައިވެރިންނަށާއި އާންމުންނަށް އިލްތިމާސްކުރައްވާފައެވެ.