ދުންފުހުގެ ނުރައްކާ ދަނީ އިތުރުވަމުން، ސަމާލުވޭ!

ރާއްޖޭގެ އެކި ސަރަހައްދުތަކަށް ދުންފުހުގެ އަސަރު ކުރަމުންދާތީ، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

ދުން ފުހުގެ އަސަރު އެންމެ ބޮޑަށް މިވަގުތު ކުރިމަތިވެފައިވަނީ މެދު ރާއްޖެތެރެއަށެވެ. ނަމަވެސް މީގެ ކުރިން އެންމެ ބޮޑަށް އެ އަސަރުކޮށްފައިވަނީ މާލެ ސަރަހައްދަށެވެ.

އެޗްޕީއޭއިން ވަނީ ކުރިއަށް އޮތް ދެ ދުވަހުވެސް ރާއްޖޭގެ ސަރަހައްދުގައި ދުންފުހުގެ އަސަރު ހުންނާނެ ކަމަށް ބެލެވޭ ކަމަށް ބުނެފަ އެވެ.

އެހެންކަމުން، އާންމު ސިއްޙަތު ރައްކާތެރިކުރުމަށްޓަކައި ޚާއްސަ ސަމާލުކަމެއް ދިނުމަށް އެ އިދާރާއިން ވަނީ އެދިފައެވެ. ވައިގެ ސާފުކަން ހުރި މިންވަރު ބަލާ "އައިކިއު އެއާ" ގެ މައުލޫމާތުތަކަށް ބަލާއިރު، އުތުރުން ކުޅުދުއްފުށި، މެދުރާއްޖެތެރެ އަދި ދެކުނުން ފުވައްމުލައް ސިޓީގައި ވައި ވަނީ ވަރަށް ބޮޑަށް ނުސާފުވެފައެވެ.

މޫސުމާބެހޭ އިދާރާތަކުން ލަފާ ކުރާ ގޮތުގައި ވައިގެ ކޮލެޓީ މިވަގުތު މި ސަރަހައްދުތަކުގައި ހުރީ ރަތް ސަމާލުގަ އެވެ.

މޫސުމާބެހޭ ޤައުމީ އިދާރާއިން ހާމަކުރި ގޮތުގައި، ވޭތުވެދިޔަ ހަތް ދުވަހަށް ބަލާއިރު ދުންފުހުގެ އަސަރު އެންމެ ބޮޑަށް ކޮށްފައިވަނީ މިއަދުއެވެ. މިކަމުގެ ސަބަބުން ދުރުފެންނަ މިންވަރު ވަނީ 2 ކިލޯމީޓަރަށް ދަށްވެފައެވެ. މެޓް އޮފީހުން ލަފާކުރާ ގޮތުގައި މި އަސަރު ރާއްޖޭގެ ހުރިހާ ސަރަހައްދަކަށްވެސް ފޯރާނެއެވެ.