ޑިރެކްޓަރުންގެ ބޯޑަށް ނަން ހުށަހެޅުމުގެ ފުރުސަތު އެސްޓީއޯ އިން ހުޅުވާލައިފި

ޑިރެކްޓަރުންގެ ބޯޑަށް ނަން ހުށަހެޅުމުގެ ފުރުސަތު އެސްޓީއޯ އިން ހުޅުވާލައިފިއެވެ.

ޑިރެކްޓަރުންގެ ބޯޑަށް ނަން ހުށަހެޅުމާއި ގުޅިގެން އާއްމުކުރި އިއުލާނެއްގައި އެސްޓީއޯ އިން ބުނީ އެ ކުންފުނީގެ ޑިރެކްޓަރުންގެ ބޯޑުގައި އާއްމު ހިއްސާދާރުންގެ ފަރާތުން އިންތިހާބުކުރާ ޑިރެކްޓަރު ކަމަށް ކުރިމަތިލުމުގެ ފުރުސަތު ހުޅުވާލައިފައިވާ ކަމަށެވެ.

އެސްޓީއޯ އިން ބުނީ އެ ކުންފުނީގެ ގަވާއިދުގައި ބަޔާންކޮށްފައިވާ ގޮތުގެ މަތިން އަދި ކުންފުނީގެ ހިއްސާ ބެހިފައިވާ ނިސްބަތަށް ބަލާއިރު، ޑިރެކްޓަރުންގެ ބޯޑަށް އާއްމު ހިއްސާދާރުންގެ ފަރާތުން 1 ޑިރެކްޓަރު އަދި ސަރުކާރު ނުވަތަ މައި ހިއްސާދާރުގެ ފަރާތުން 6 ޑިރެކްޓަރުން އިންތިހާބުކުރާ ކަމަށެވެ. އެގޮތުން ކުންފުނީގެ ޑިރެކްޓަރުންގެ ބޯޑަށް އިންތިހާބުކުރާ ހުރިހާ ޑިރެކްޓަރުންނަކީވެސް ވިޔަފާރި އާއި ހިންގުމުގެ ދާއިރާއިން އެކަށީގެންވާ ތައުލީމާއި ތަޖުރިބާ ލިބިފައިވާ ފަރާތްތަކަށް ވުމަށް އެކުންފުނިން ބާރު އަޅާ ކަމަށެވެ.

މީގެ އިތުރުން ސީއެމްޑީއޭގެ ކޯޕަރޭޓް ގަވަރނަންސް ކޯޑުގައި ބާރުއަޅާފަދައިން ކުންފުނީގެ ބޯޑަށް ވީހާވެސް ގިނަ އަންހެން ބޭފުޅުން ޝައުގުވެރިކަން ފާޅުކުރުމާއި އިންތިހާބުގައި ވާދަކުރުމަކީވެސް އެސްޓީއޯ އިން ބާރުއަޅާ ކަމެއް ކަމަށް ވަނީ ބުނެފައެވެ. އަދި އެކަމަކީ މިންތީގެ ހަމަހަމަކަން ގާއިމްކުރަން އެކުންފުނިން ކުރަމުންދާ މަސައްކަތަށް އިތުރު ހިތްވަރެއް ލިބިގެންދާ ކަމެއް ކަމަށްވެސް ބުނެފައިވެއެވެ.

އާއްމު ހިއްސާދާރުންގެ ފަރާތުން އެސްޓީއޯގެ ބޯޑަށް ކުރިމަތިލާ ފަރާތެއް ނުވަތަ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި

ކުންފުނީގެ ހިއްސާދާރަކަށް ވުމާއި ދިވެހި ރައްޔިތަކަށް ވުމުގެ އިތުރުން އުމުރުން 30 އަހަރު ފުރިފައިވާ ފަރާތެއް ކަމުގައިވާންޖެހެއެވެ.

ސީއެމްޑީއޭގެ ކޯޕަރޭޓް ގަވަރނަންސް ކޯޑާއި ފިޓް އެންޑް ޕްރޮޕަރ ގައިޑްލައިން ގައި ބޯޑު ޑިރެކްޓަރެއްގެ ހުންނަންވާނެ ކަމަށް ބަޔާންކުރާ ޝަރުތުތައް ފުރިހަމަވެފައިވުމާއި އެމްކިޔުއޭ ގަބޫލުކުރާ ޔުނިވަރސިޓީއަކުން ވިޔަފާރިއާއި ގުޅުންހުރި ދާއިރާއަކުން ދަށްވެގެން ފުރަތަމަ ޑިގްރީ ފެންވަރުގެ ސަނަދަކާއި އެކު 5 އަހަރު ދުވަހުގެ އަމަލީ ތަޖުރިބާ ނުވަތަ ޑިޕްލޮމާ ފެންވަރުގެ ސަނަދަކާއެކު މަދުވެގެން 10 އަހަރު ދުވަހުގެ އަމަލީ ތަޖުރިބާ ލިބިފައިވާ ފަރާތަކަށް ވާން ޖެހެއެވެ.

ކުންފުނީގެ ވިޔަފާރިއާއި ވިޔަފާރީގެ ދާއިރާތަކާއި ބެހޭ ގޮތުން އަހުލުވެރި ފަރާތަކަށް ވުމުގެ އިތުރުން މާލީ ރިޕޯޓްތައް އެނަލައިޒް ކުރުމުގެ ގާބިލްކަން ލިބިފައިވާ ފަރާތެއް ކަމުގައި ވުމާއި ކުންފުނީގެ ކަންކަމަށް އެކަށީގެންވާ ވަގުތު ދިނުމާއި ޖަލްސާތަކަށް އެކަށީގެންވާ ވަގުތު ދެވޭނެ ކެރިކުޅަދާނަ ވެގެންވާ ފަރާތަކަށް ވުމަކީވެސް އާއްމު ހިއްސާދާރުންގެ ފަރާތުން ޑިރެކްޓަރުންގެ ބޯޑަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ބައެއް ޝަރުތުތަކެވެ.

އާއްމު ހިއްސާދާރުންގެ ފަރާތުން އެސްޓީއޯގެ ބޯޑުގެ ޑިރެކްޓަރު ކަމަށް ކުރިމަތިލާ ފަރާތަކީ އެއްވެސް ކަހަލަ ވައްކަމާއި ހިޔާނާތުގެ މައްސަލައެއްގައި ތުހުމަތުކުރެވޭ އަދި ޝާމިލްވާ ފަރާތަކަށް ނުވުމާއި ސާބިތު ދަރަންޏެއް ނެތް މީހަކަށް ވުމުގެ އިތުރުން ކުންފުންޏެއްގެ ޑިރެކްޓަރުކަން އަދާކުރުން ޝަރުއީ ގޮތުން މަނާކޮށްފައިވާ ނުވާ ފަރާތަކަށް ވާންޖެހެއެވެ.

އާއްމު ހިއްސާދާރުންގެ ޑިރެކްޓަރުކަަމަށް ޝަރުތުހަމަވާ ފަރާތްތަކުން ޑިރެކްޓަރުކަމަށް އެދޭ ފޯމާއި ފޯމްގައި ބަޔާންކުރާ ލިޔެކިޔުންތަކާއެކު އަންނަ ފެބްރުއަރީ މަހުގެ 25 ވަނަ ދުވަހުގެ 15:00 ގެ ކުރިން ކުންފުނީގެ ސެކްރެޓޭރިއަޓަށް އެޑްރެސްކޮށް އީމެއިލް ކުރުމަށް ވަނީ އެދިފައެވެ.

އާއްމު ހިއްސާދާރުންގެ ޑިރެކްޓަރުކަމަށް ކުރިމަތިލުމަށް އެދޭ ފަރާތްތަކުން އަމަލުކުރަންޖެހޭ އުސޫލާއި ގައިޑްލައިންތަކާއި އިތުރު މައުލުމާތު ކުންފުނީގެ ވެބްސައިޓް އިން ލިބޭނެ ކަމަށް ބަޔާނުގައި ބުނެފައިވެއެވެ.