"އޮޅުހިޔާ" އަށް ކުރި ހަރަދު ހޯދުމަށްފަހު ދަނޑުވެރިކަމާއި ދިރޭތަކެއްޗާބެހޭ ވުޒާރާއާ ހަވާލުކުރުމަށް މާލޭ ސިޓީ ކައުންސިލުން ފާސްކޮށްފިއެވެ.
މާލޭ ސިޓީގެ މަގުމަތީގައި އުޅޭ ބުޅާތައް ގެންދިއުމަށް ހެދި ފެސިލިޓީ "އޮޅުހިޔާ" އަށް މާލޭ ސިޓީ ކައުންސިލުން ހޭދަކުރި ހަރަދު ހޯދުމަށްފަހު، ދަނޑުވެރިކަމާއި ދިރޭތަަކެއްޗާއިބެހޭ ވުޒާރާއިން އެދުނު ގޮތަށް ، އެ ވުޒާރާއާ ބުޅާ ފެސިލިޓީ ހަވާލުކުރުމަށް ފާސްކުރީ މާލެ ސިޓީ ކައުންސިލުން ބޭއްވި އާންމު ޖަލްސާގައެވެ.
މާލޭ ސިޓީ ކައުންސިލްއިން ބޭއްވި އާއްމު ޖަލްސާގައި މޭޔަރު އާޒިމް ވިދާޅުވީ ބުޅާ ފެސިލިޓީއަކީ ސިޓީ ކައުންސިލުން ވަރަށް ބޮޑު ހޭދައެއް ކޮށްގެން ތައްޔާރުކޮށްފައިވާ ތަނެއް ކަމަށާއި، ފެސިލިޓީ ސަރުކާރާ ހަވާލުކުރަން އަންގާފައިވަނީ ފެސިލިޓީގެ ހިދުމަތްތައް ފަށައި، ބުޅާތައްވެސް ގެންދިއުމުގެ ތައްޔާރީތައް ވެފައިވަނިކޮށް ކަމަށެވެ.
ސިޓީ ކައުންސިލްގެ މެންބަރުން ވިދާޅުވީ ވުޒާރާއިން އެދިފައިވާ ގޮތަށް، ބުޅާ ފެސިލިޓީ ހަވާލުކުރާނޭ ކަމަށާއި، އެކަން ކުރާނީ ނަމަވެސް އެ ފެސިލިޓީ ތައްޔާރުކުރުމަށް ސިޓީ ކައުންސިލްގެ ބަޖެޓުން ހޭދަކުރި ހަރަދު ލިބޭނެގޮތަށް ކަމަށެވެ. އަދި އެގޮތަށް އެކަންކުރަން ކައުންސިލް ޖަލްސާއިން ވަނީ ފާސްކޮށްފައެވެ.
ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ވަނީ މާލޭ ސިޓީ ކައުންސިލުން އެ ވުޒާރާއާއެކު އެއްބަސްވެފައިވާގޮތަށް ކަންކަން ނުގެންދާކަމަށް ބުނެ، ބުޅާ ފެސިލިޓީ އަނބުރާ ހަވާލުކުރުމަށް އަންގައި މާލޭ ސިޓީ ކައުންސިލަށް ސިޓީއެއް ފޮނުވާފައެވެ.
މާލޭ ސިޓީ ކައުންސިލުން އޮޅުހިޔާ ތަރައްގީކުރީ ދިރޭތަކެއްޗާއި ބެހޭ ވުޒާރާގެ ބެލުމުގެ ދަށުންނެވެ. އެ ވުޒާރާއާއި މާލޭ ސިޓީ ކައުންސިލާމެދު ވެފައިވާ އެއްބަސްވުމުގެ ދަށުން އެ ފެސިލިޓީއަށް މާލޭގެ މަގުމަތީގައި އުޅޭ ބުޅާތައް ގެންދިއުމަށް ވެސް ބަޔާންކޮށްފައި ވެއެވެ. އެ އެއްބަސްވުމެއްގައި، އަމަލުކުރާނެ ޕްލޭނެއްވެސް އެކުލަވާލާފައިވެއެވެ.
ދިރޭތަކެއްޗާއި ބެހޭ ވުޒާރާއިން ބުނީ ޕްލޭނާ އެއްގޮތަށް ، އެތަން އޮޕަރޭޝަނަށް ގެނައުމުގެ އެއްވެސް ކަމެއް ސިޓީ ކައުންސިލުން ނުކުރާ ކަމަށެވެ.
މާލޭސިޓީ ކައުންސިލުން ބުޅާ ފެސިލިޓީގެ މަސައްކަތްތައް ކުރިއަށް ނުގެންދާތީވެ، ދިރޭތަކެއްޗާއި ބެހޭ ވުޒާރާއިން ވަނީ މާލޭ ސިޓީ ކައުންސިލާ ބައްދަލުކޮށް، މަސައްކަތްތައް ލަސްވަމުންދާ ކަންކަމަމާ ގުޅޭގޮތުން މަޝްވަރާވެސް ކޮށްފައެވެ.
މާލޭ ސިޓީ ކައުންސިލުން ބުޅާތައް ފެސިލިޓީއަށް ގެންދިޔުމުގެ މަސައްކަތް ފަށަން އިއުލާނުކުރުމުން، ދިރޭތަކެއްޗާއި ބެހޭ ވުޒާރާއިން ބުނީ މައްސަލަ ހައްލުނުކޮށް އޮޅުހިޔާއަށް ބުޅާތައް ނުގެންދިއުމަށް އިލްތިމާސް ކުރިއެވެ.
މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އިން ނެރުނު ބަޔާނެއްގައި ބުނީ މާލޭ ސިޓީގެ މަގުމަތީގައި އުޅޭ ބުޅާތައް އޮޅުހިޔާއަށް ގެންދިއުމުގައި އަމަލުކުރާނެ ގޮތުގެ އެސް.އޯ.ޕީތަކާއި، ޕްލޭންތަކާއި ލަފާތައް އެ މިނިސްޓްރީން ސިޓީ ކައުންސިލާ ހިއްސާކޮށްފައިވީ ނަމަވެސް، މިހާތަނަށް އެއްވެސް ހިޔާލެއް ލިބިފައިނުވާތީ، އެކައުންސިލުން ރާވާފައިވާ ގޮތަށް މަގުމަތީގައި ވީއްލިގެން އުޅޭ ބުޅާތައް އޮޅުހިޔާއަށް މިވަގުތު ގެންދިއުމަކީ ފެންނަކަމެއް ނޫންކަމަށް އަންގާފައެވެ.
