މި ފެށޭ ހަފްތާ ތެރޭގައި، ކެޓް ޝެލްޓަރއަށް ބުޅާތައް ގެންދަން ފަށަން މަސައްކަތް ކުރަމުން އަންނަ ކަމަށް މާލެ ސިޓީ ކައުންސިލުން ބުނެފިއެވެ.
މާލޭ މަގުމަތީގައި ވެރިޔަކު ނެތި ވީއްލިގެން އުޅޭ ބުޅާތަކަށް ހިޔާވައްސެއް ހޯދައިދިނުމަށް ގާއިމްކުރި ކެޓް ޝެލްޓަރ ނުވަތަ ޕެޓް ކެއާ ފެސިލިޓީ ހުޅުވީ މިމަހުގެ ދެވަނަ ދުވަހުއެވެ. "އޮޅު ހިޔާ" ގެ ނަމުގައި ހުޅުވި މި ފެސިލިޓީ ބަލަހައްޓަނީ މާލެ ސިޓީ ކައުންސިލުންނެވެ.
ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނީ ކެޓް ޝެލްޓަރއަށް ބުޅާތައް ގެންދަން ފެށުމުގެ އެންމެ ފަހުގެ މަޝްވަރާތައް އެން.ޖީ.އޯސް ތަކާއިއެކު ކުރިއަށްދާ ކަމަށެވެ. އަދި ކައުންސިލުން މަސައްކަތް ކުރަމުން ދަނީ ޑިސެމްބަރ މަހުގެ ފުރަތަމަ ހަފްތާގައި މާލެތެރޭ އުޅޭ ބުޅާތައް މަގުމަތިން ނަގަން ފެށުމަށް ކަމަށް ވެސް ބުނެފައިވެއެވެ.
ބުޅާ ފެސިލިޓީ އެޅުމުގެ އަމަލީ މަސައްކަތް ފަށާފައި ވަނީ މާޗު މަހުގެ 19 ވަނަ ދުވަހެވެ. މިކަމަށް ހުޅުމާލެ ދެވަނަ ފިޔަވަހިން ފަރުކޮޅުފުށި ސަރަހައްދުގައި 5،000 އަކަފޫޓުގެ ބިމެއް މިކަމަށްވަނީ ޚާއްސަކޮށްފަ އެވެ. އެމަޝްރޫއުގެ ދަށުން ހަދާ ކެޓް ޝެލްޓަރގައި ބުޅަލާއެކު ޢާންމުންނަށް ވަގުތު ހޭދަކޮށްލެވޭ ގޮތަށް ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއް ވެސް ހުޅުވާނެއެވެ.
މާލެ ސަރަހައްދުގެ ޕާރކްތަކާއި މަގުމަތީގައާއި އަދި މިނޫންވެސް އާންމުން އެއްވެ އުޅޭ ސަރަހައްދުތަކުގައި ބުޅާތައް ގިނަވެފައިވުމުން އެ ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި ސާފު މާހައުލެއް ގާއިމް ކުރުމަށް ހުޅުވި ފެސިލިޓީއެކެވެ.
މީގެ އިތުރުން ގޭގޭގައި ގެންގުޅޭ ބުޅާތަކަށް ފެންވަރު ރަނގަޅު ސިއްހީ ފަރުވާ މި ފެސިލިޓީއިން ލިބިގެންދާނެ އެވެ. މި ފެސިލިޓީ ގާއިމްކުރުމުގެ ސަބަބުން އާންމު ރައްޔިތުންނަށް، ބުޅާތައް ގިނަވެފައިވުމުން ދިމާވެފައިވާ އުނދަގޫތަކަށް ހައްލެއް ލިބިގެންދާނެއެވެ. އެގޮތުން މި ފެސިލިޓީ މެދުވެރިކޮށް، ބުޅާތަކަށް ބޭނުންވާނެ ފުރިހަމަ އަޅާލުންލިބިގެންދާނެ އެވެ. އޭގެ ތެރޭގައި ބުޅާތައް ކަރަންޓީން ކުރެވޭ ސަރަހައްދަކާއި، ކްލިނިކްއަކާއި، ފާރމަސީއާއި، ލެބޯޓްރީ، އަދި ހިޔާވަހިކަމާއި، އެކަށީގެންވާ ސިއްހީ ފަރުވާ އަދި ކުޅޭ ސަރަހައްދު ފަދަ ތަފާތު ހިދުމަތްތައް އެއް ފުރާޅެއްގެ ދަށުން ލިބިގެންދާނެ އެވެ.
