މާލޭގައި ހުންނަ ދަރުމަވަންތަ ހޮސްޕިޓަލްގެ ޚިދުމަތްތައް ފުރިހަމަކުރަން އިތުރު އިމާރާތެއް ބިނާ ކުރައްވަން ނިންމަވާފައިވާ ކަމަށް ރައީސް، ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވެފައިވަނީ އެމަނިކުފާނުގެ ފުރަތަމަ ރިޔާސީ ބަޔާން މިއަދު މަޖިލީހުގައި އިއްވަމުންނެވެ.
އެގޮތުން ރައީސް ވިދާޅުވީ، ރަށްރަށުގެ ޞިއްޙީ ޚިދުމަތުގެ ފެންވަރު ރަނގަޅު ކުރާއިރު، ކޮންމެ ރަށެއްގައި ވެސް އެ ރަށަކާ އެކަށޭނަ ލެބޯޓްރީއެއް އިރާދަކުރެއްވިއްޔާ ޤާއިމުކޮށްދެއްވާނެ ކަމަށާއި ރާއްޖޭގެ އެކި ސަރަޙައްދުގައި ޓާޝަރީ ހޮސްޕިޓަލް ބިނާކުރުމަށް ސަރުކާރުން މިއަހަރު ފަށާ މަޝްރޫޢު ފުރިހަމަވުމުން މާލެ ނައިސް ރަށާ ކައިރިން ޞިއްޙީ ފަރުވާ ހޯދޭނެ މަގު ރައްޔިތުންނަށް ފަހިވެގެންދާނެ ކަމަށެވެ.
ނަފްސާނީ ބަލިތަކަށް ފަރުވާދޭ ޚާއްޞަ ހޮސްޕިޓަލެއް ލ. އަތޮޅުގައި ތަރައްޤީ ކުރެވިގެންދިއުމުގެ އިތުރުން ކެންސަރަށް ފަރުވާދޭ ޚާއްޞަ ހަސްފަތާލަކާ، ތެލަސީމިއާ ކުދީންނަށް ފަރުވާދޭ ޚާއްޞަ ހަސްފަތާލަކާ، އަންހެނުންނާ ކުޑަކުދީންނަށް ފަރުވާދޭ ޚާއްޞަ ހަސްފަތާލެއް މި ދައުރުގައި މާލެ ސިޓީގައި އިރާދަކުރެއްވިއްޔާ ބިނާކުރެވޭނެ ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ، ދަރުމަވަންތައް ހޮސްޕިޓަލުގެ ހިދުމަތް އިތުރަށް ފުރިހަމަ ކުރުމަށްޓަކައި ޒަމާނީ އިތުރު ބިނާއެއް ބިނާކޮށް، ވިލިމާލޭގައި ވެސް 100 އެނދުގެ ޓާޝަރީ ހޮސްޕިޓަލެއް މި ސަރުކާރުން އަޅުއްވާނެ ކަމަށެވެ.
މީގެ އިތުރުން އައްޑޫ ހިތަދޫގައި ހުރި ހޮސްޕިޓަލް އަދި ކުޅުދުއްފުށީގައި ހުރި ހޮސްޕިޓަލްގެ ފެންވަރު މަތިކޮށް، މާލެ ނައިސް މައިގަނޑު ހުރިހާ ފަރުވާއެއް ލިބޭ ފެންވަރަށް ތަރައްގީކުރުމުގެ މަސައްކަތް މި އަހަރު ފެށިގެންދާނެ ކަމަށް ވެސް ރައީސް ވަނީ ވިދާޅުވެފައެވެ.
މިސަރުކާރުގެ ތަޞައްވުރާ އެއްގޮތަށް ރާއްޖޭގެ އެކި ކަންކޮޅުތަކުގައި މިކަންކަން ފުރިހަމަވާއިރު، ރާއްޖޭން ބޭރަށް ނުގޮސް ގިނަ ޞިއްޙީ ފަރުވާތައް ހޯދޭނެ ކަމަށާއި އަދި ފަރުވާ ހޯދުމަށް ހޮސްޕިޓަލްތަކުގައި ކިޔޫގައި ގިނަދުވަހު އިންތިޒާރުކުރަން ނުޖެހި އިރާދަކުރެއްވިއްޔާ އަވަސް ޚިދުމަތް ލިބެން ފަށާނެ ކަމަށް ވެސް ރައީސް ވަނީ ވިދާޅުވެފައެވެ.
