ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާ މިރޭ އޮންނާނެ

ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާ މިރޭ އޮންނާނެއެވެ.

ރަސްމީ ޖަލްސާ އޮންނާނީ މިރޭ ދަރުބާރުގޭ ރަންނަބަނޑޭރި މާލަމުގައެވެ.

މިރޭގެ ޖަލްސާގައި ދިވެހިރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަދި ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިންއަށް އެރުވުން އޮންނާނެއެވެ. މި ޝަރަފް އަރުވާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

މިރޭގެ ޖަލްސާގައި، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްސަ އިނާމު ދެއްވުމާއި، ދައުލަތުގެ އިނާމު ލިބިވަޑައިގަންނަވާ ބޭފުޅުންނަށް ރައީސުލްޖުމްހޫރިއްޔާ އިނާމު ދެއްވުންވެސް އޮންނާނެއެވެ.

މިއީ، ޑރ. މުޙައްމަދު މުޢިއްޒު، ރައީސުލްޖުމްހޫރިއްޔާގެ ހައިސިއްޔަތުން ބައިވެރިވެވަޑައިގަންނަވާ ޖުމްހޫރީ ދުވަހުގެ ފުރަތަމަ ރަސްމީ ޖަލްސާއެވެ.

2023 ވަނަ އަހަރުގެ ޖުމްހޫރީ ދުވަސް އައިއިރު، ޑރ. މުޙައްމަދު މުޢިއްޒު ހުންނެވީ "އިންތިޚާބީ ރައީސް" ގެ ގޮތުގައެވެ.

އެދުވަހު ރާއްޖޭގެ ރައްޔިތުންނަށް ދުވަހުގެ ތަހުނިޔާ ފޮނުއްވައި ހިއްސާކުރެއްވި މެސެޖްގައި އެމަނިކުފާނު ވިދާޅުވީ، ޖުމްހޫރީ ވެރިކަމުގެ ފޮނިމީރުކަން ރައްޔިތުންނަށް ލިބިގެންދާނީ ރައްޔިތުންނާއި ސަރުކާރު ގުޅިގެން ގައުމު އިސްކޮށްގެން މަސައްކަތް ކޮށްގެން ކަމަށެވެ.

ރާއްޖޭގައި ޖުމްހޫރީ ދުވަސް ފާހަގަކުރަމުން އަންނަނީ ރާއްޖޭގައި އޮތް ރަސްކަމަށްފަހު، ވެރިކަމުގެ ނިޒާމު ދެވަނަ ފަހަރަށް ޖުމްހޫރީ ވެރިކަމަކަށް ބަދަލުވެގެންދިޔަ ތާރީޚުކަމަށްވާ 11 ނޮވެމްބަރު 1968 އަށް ނިސްބަތްކޮށެވެ. ދެވަނަ ޖުމްހޫރިއްޔާގެ ފުރަތަމަ ރައީސަކަށް އިންތިޚާބު ކުރެވުނީ އަލްމަރްޙޫމް އިބްރާހީމް ނާޞިރެވެ.

ދެވަނަ ޖުމްހޫރިއްޔާގެ 2 ވަނަ ރައީސަކީ އަލްއުސްތާޛް މައުމޫން ޢަބްދުލްޤައްޔޫމެވެ. ދެވަނަ ޖުމްހޫރިއްޔާގެ 3 ވަނަ ރައީސަކީ މުޙައްމަދު ނަޝީދެވެ. ދެވަނަ ޖުމްހޫރިއްޔާގެ 4 ވަނަ ރައީސަކީ ޑރ. މުޙައްމަދު ވަޙީދު ޙަސަންމަނިކެވެ. ދެވަނަ ޖުމްހޫރިއްޔާގެ 5 ވަނަ ރައީސަކީ ޢަބްދުﷲ ޔާމީން ޢަބްދުލްޤައްޔޫމެވެ. ދެވަނަ ޖުމްހޫރިއްޔާގެ 6 ވަނަ ރައީސަކީ އިބްރާހީމް މުޙައްމަދު ޞާލިޙެވެ. މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަކީ ދެވަނަ ޖުމްހޫރިއްޔާގެ 7 ވަނަ ރައީސެވެ.

ޖުމްހޫރީ ދައުލަތެއްގެ މާނައަކީ ރައްޔިތުންގެ ވެރިކަމެއް ކުރާ ދައުލަތެވެ. ޖުމްހޫރީ ވެރިކަމެއްގައި ދައުލަތުގެ ހުރިހާ ކަންކަން ނިންމެންޖެހޭނީ ރައްޔިތުން އެކަމަށް ކަނޑައަޅާ އުސޫލުތަކުންނެވެ.

ޖުމްހޫރީ ވެރިކަމެއްގެ އެންމެ އަސާސީ އެއް ސިފައަކީ ގައުމުގެ އެންމެ މަތީ ވެރިޔާއަކީ ރައްޔިތުންގެ ސީދާ ވޯޓުން، ރައްޔިތުންގެ ގިނަ ބައެއްގެ ތާއީދާއެކު އިންތިޚާބު ކުރެވޭ ބޭފުޅަކަށްވުމެއެވެ.