ރައީސް މުއިއްޒަކީ ކަންކަން ތަރުތީބުކޮށް ޕްލޭންކޮށް ބަޖެޓް އެއަށް ހޯދައިގެން ކަންކަން ކުރާ ވެރިއެއް : ފަލާހު

ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒާއި މި ސަރުކާރަކީ ކަންކަން ތަރުތީބުކޮށް ޕްލޭންކޮށް ބަޖެޓް އެއަށް ހޯދައިގެން ކަންކަން ކުރާ ސަރުކާރެއް ކަމަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހް ވިދާޅުވެއްޖެއެވެ.

ޕީއެންސީއިން ރޭ ފުވައްމުލަކު ސިޓީގައި ބޭއްވި ޖަލްސާގައި ވާހަކަދައްކަވަމުން ފަލާހު ވިދާޅުވީ ފުވައްމުލަކުން ޕީއެންސީގެ ޓިކެޓްގައި ވާދަކުރައްވާ ކެޑިޑޭޓުންގެ ގާބިލުކަމާ މެދު އެއްވެސް ޝައްކެއް ނެތް ކަމަށެވެ. ޕީއެންސީއަކީ މިވަގުތު ރާއްޖޭގައި އޮތް އެންމެ ބޮޑު ސިޔާސީ ޕާޓީކަން ފާހަގަކުރައްވާ ފަލާހު ވިދާޅުވީ ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި އެންމެ ގިނަ ކެންޑިޑޭޓުން ވާދަކުރައްވަނީ އެޕާޓީން ކަމަށެވެ. އަދި ލޯކަލް ކައުންސިލްތަކުގެ އިންތިހާބުގައި ރާއްޖޭގެ ހުރިހާ ކަންކޮޅަކުން ވެސް އެންމެ ގާބިލު ކެންޑިޑޭޓުން ނިކުމެފައި ތިބީ ޕީއެންސީން ކަމަށެވެ.

ފަލާހް ވިދާޅުވީ މިދިޔަ އެމްޑީޕީގެ ވެރިކަމުގައި އެމްޑީޕީގެ ކައުންސިލްތައް ގާއިމްކޮށްފައިތިބި ރަށުގައި ބޮޑެތި މަޝްރޫތައް ހިންގާފައިހުރީ ވަރަށް ފަރުވާކުޑަކޮށް ކަމަށެވެ. އެއީ އެތަންތަނުގައި ތިބި ކައުންސިލްތަކުގެ ޒިންމާދަރު ކުޑަކަމުން ކަމަށް ވެސް ވިދާޅުވިއެވެ.

ރ. އަތޮޅުގައި ގިނަ ރަށްރަށުގައި މިދިޔަ ސަރުކާރުން ގާއިމްކޮށްފައިވާ ފެނާއި ނަރުދަމާ މަޝްރޫއަށް އިޝާރާތް ކުރައްވަމުން ފަލާހު ވިދާޅުވީ އެތަނުގައި ގާއިމްކޮށްފައި ވާ ހޮޅިތަކާއި ނަރުތައް ރައްޔިތުންނަށް ހިދުމަތް ދިނުމުގެ ކުރިން ފީވެ އަޅިއަށްވެފައިވާ ކަމަށެވެ.

މިއިން އެނގެނީ ޒިންމާދާރު ނޫން ސަރުކާރާއި ގުޅުން ނެތް ނުވަތަ ރައްޔިތުންދެކެ ލޯބިނުވާ ރައްޔިތުންގެ މާލިއްޔަތަށް އެއްވެސް ބެލުމެއްނެތް ކުރާނެ ގޮތަކަށް ކަންތައްކުރާ ކައުންސިލަރުން ހޮވުނީމަ ވާނެ ގޮތް: ފަލާހް

ފަލާހު ވިދާޅުވީ ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒާއި މި ސަރުކާރަކީ ކަންކަން ތަރުތީބުކޮށް ޕްލޭންކޮށް ބަޖެޓް އެއަށް ހޯދައިގެން ކަންކަން ކުރާ ސަރުކާރެއް ކަމަށެވެ.

ފަލާހު އިތުރަށް ވިދާޅުވީ ކޮންގުރެސް ޕާޓީން ކައުންސިލު އިންތިހާބުގައި ވާދަކުރައްވާ ކެންޑިޑޭޓުން އިންތިހާބުކޮށްދެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގަންނަވަނީ އެމަނިކުފާނު ވެވަޑައިގެންފައިވާ ވައުދުފުޅުތައް އެންމެ ބާރު ދުވެލީގައި ކުރިއަށްގެންގޮސް ރަނުން ރަނަށް ނިންމަވައިލެއްވުމަށް އެދިވަޑައިގަންނަވާތީ ކަމަށެވެ.

ފުވައްމުލަކު ރައްޔިތުން ބޭނުންވާ ގިނަަ މަސައްކަތްތަކެއް މިހާރު ފެށިފައި ހުރިކަން ފާހަގަކުރައްވަމުން ފަލާހުވަނީ ކުރިއަށް އޮތް ދުވަސްތަކުގައި ސަރުކާރުން އެ މަޝްރޫއުތައް ބާރު ދުވެލީގައި ކުރިއަށްގެންގޮސް ނިންމައިދޭނެ ކަމުގެ ޔަގީންކަން އެ ރަށުގެ ރައްޔިތުންނަށް ދެއްވާފައެވެ.