ވޯލްޑް ބޭންކުގެ ވަފުދެއް އައްޑޫ އާއި ފުވައްމުލަކަށް!

ދުނިޔޭގެ ބޭންކު (ވޯލްޑް ބޭންކު) ގެ އެހީގައި ރާއްޖޭގައި ކުރިއަށްގެންދާ "އެސްޕަޔަރ އަދި "އަރައިޒް" މަޝްރޫއުގެ ދަށުން ގާއިމުކޮށްފައިވާ ސޯލާ ޕީވީ ނިޒާމުތައް ބަލައިލުމަށް އެ ބޭންކުގެ މަތީ ފަންތީގެ ވަފުދެއް މި ހަފުތާގައި އައްޑޫ ސިޓީ އަދި ފުވައްމުލައް ސިޓީއަށް ޒިޔާރަތްކޮށްފިއެވެ.

މި ޒިޔާރަތަކީ ވޯލްޑް ބޭންކުގެ އެހީގައި ހިންގާ ހުރިހާ މަޝްރޫއުތަކެއްގެ ތިމާވެށީގެ އަދި އިޖުތިމާއީ ކަންކަން ތަންފީޒުވަމުންދާ މިންވަރު ބަލައި، އެކަންކަމަށް ބޭނުންވާ އެހީތެރިކަން ފޯރުކޮށްދިނުމަށް ކުރިއަށްގެންދާ "އެންވަޔަރަންމަންޓް އެންޑް ސޯޝަލް އިމްޕްލިމެންޓޭޝަން ސަޕޯޓް" މިޝަންގެ ބައެކެވެ.

ވޯލްޑް ބޭންކުގެ ސައުތު އޭޝިއާ ރީޖަންގެ އެންވަޔަރަންމަންޓަލް އެންޑް ސޯޝަލް ސްޓޭންޑަރޑްސް ޕްރެކްޓިސް މެނޭޖަރު ޖަންމޭޖޭ ސިންގް އިސްކޮށް ހުންނެވި މި ވަފުދުގައި، އެ ބޭންކުގެ ސްްރީލަންކާ ރީޖަނަލް އޮފީހުގެ އިސް ބޭފުޅުން ބައިވެރިވެވަޑައިގެންނެވިއެވެ.

މި ދަތުރުގައި ވަފުދުގެ ބޭފުޅުން ވަނީ އައްޑޫ ސިޓީގައި ގާއިމުކޮށްފައިވާ 3 މެގަވޮޓްގެ ސޯލާ ޕީވީ ނިޒާމާއި، ފުވައްމުލަކު ސިޓީގައި ގާއިމުކޮށްފައިވާ 2 މެގަވޮޓްގެ ސޯލާ ޕީވީ ނިޒާމުގެ މަސައްކަތްތައް ކުރިއަށްދާ ގޮތް ތަފްސީލީ ގޮތެއްގައި ބައްލަވާލައްވާފައެވެ.

އައްޑޫ އާއި ފުވައްމުލަކުގައި ކުރިއަށްދާ ސޯލާ ޕީވީގެ މަސައްކަތްތަކުގެ އިތުރުން، ބެޓަރީ އެނަރޖީ ސްޓޯރޭޖް ސިސްޓަމް އަދި ކަރަންޓު ވިއުގަ އަޕްގްރޭޑް ކުރުމުގެ މަސައްކަތްތައް ހިނގަމުންދާ ސައިޓުތަކަށްވެސް މި ވަފުދުން ޒިޔާރަތްކުރިއެވެ. އަދި އެ ސައިޓުތަކުގައި އަމަލީ މަސައްކަތުގައި އުޅޭ ޓީމުތަކާ ބައްދަލުކޮށް، މަސައްކަތުގެ ފެންވަރާއި ކުރިއެރުމާ ގުޅޭގޮތުން މަޝްވަރާކޮށްފައިވެއެވެ.

މި ދަތުރުގެ ތެރެއިން ވޯލްޑް ބޭންކުގެ ވަފުދުން ވަނީ އައްޑޫ ސިޓީގެ މޭޔަރު އަލީ ނިޒާރާވެސް ބައްދަލުކުރައްވާފައެވެ. މި ބައްދަލުކުރެއްވުމުގައި، މިހާރު ކުރިއަށްދާ ބެޓަރީ ސްޓޯރޭޖް ސިސްޓަމާއި، ގްރިޑް އަޕްގްރޭޑް ކުރުމުގެ މަސައްކަތްތަކާ ގުޅޭގޮތުން މޭޔަރުގެ ފީޑްބެކް ހޯއްދަވައި، މަޝްރޫއުގެ ސަބަބުން ރަށުގެ ރައްޔިތުންނަށް ކުރާނެ ފައިދާތަކާ ގުޅޭގޮތުން ވާހަކަދެކެވުނެވެ.