މަސްވެރިންގެ ދުވަހާ ގުޅިގެން ބާއްވާ ބަހުސް މުބާރާތުގައި ބައިވެރިވުމުގެ ފުރުސަތު ހުޅުވާލައިފި

މިއަހަރު ފާހަގަކުރާ 46 ވަނަ މަސްވެރިންގެ ދުވަހުގެ މުނާސަބަތުގައި ބޭއްވުމަށް ހަމަޖެހިފައިވާ ޚާއްޞަ ބަހުސް މުބާރާތުގައި ބައިވެރިވުމުގެ ފުރުސަތު މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއިން އާންމުކޮށް ހުޅުވާލައިފިއެވެ.

މި މުބާރާތަކީ ދިވެހިރާއްޖޭގެ އިޤްތިޞާދުގެ މައި އެއް ތަނބު ކަމުގައިވާ މަސްވެރިކަމުގެ ސިނާއަތާ މެދު ޒުވާނުން އަހުލުވެރިކުރުވައި، ވާހަކަދެއްކުމުގެ ހުނަރު ކުރިއެރުވުމުގެ މަޤްޞަދުގައި، ފިޝަރީޒް މިނިސްޓްރީއާއި ދިވެހިބަހުގެ އެކެޑަމީ ގުޅިގެން ބޭއްވުމަށް ހަމަޖެހިފައިވާ މުބާރާތެކެވެ.

މި މުބާރާތް ކުރިއަށް ގެންދިއުމަށް ހަމަޖެހިފައިވަނީ "މަސްވެރިކަމުގެ ސިނާއަތުގައި ޒުވާނުންގެ ބައިވެރިވުން އިތުރުކުރުން" މި ޝިޢާރުގެ ދަށުން، 2026 ވަނަ އަހަރުގެ ޑިސެންބަރު މަހުގެ 3 އިން 7 ވަނަ ދުވަހުގެ ނިޔަލަށެވެ.

ރާއްޖޭގެ މަސްވެރިކަމުގެ ދާއިރާއަށް ޒުވާނުންގެ ޝައުޤުވެރިކަން އިތުރުކުރުމަކީ ޚާއްޞަ އިސްކަމެއް ދެއްވައިގެން ކުރިއަށްގެންދަވާ މުހިންމު ސިޔާސަތެކެވެ. އެގޮތުން، ޤައުމީ ފެންވަރުގައި މަސްވެރިންގެ ދުވަސް ކުލަގަދަކޮށް ފާހަގަކުރަމުންދާއިރު، ދިވެހި ޒުވާނުންގެ މެދުގައި ފިކުރީ ގޮތުންނާއި އިލްމީ ގޮތުން މި ދާއިރާއަށް އޮތް ވިސްނުން ފުޅާކުރުމަށް މިފަދަ ބަހުސް މުބާރާތްތަކަކީ ވަރަށް މުހިންމު ދައުރެއް އަދާކުރާނެ ކަމެއް ކަމަށް މިނިސްޓްރީން ފާހަގަކުރެއެވެ.

ފިޝަރީޒް މިނިސްޓްރީން ބުނި ގޮތުގައި، މި މުބާރާތުގައި ބައިވެރިވާން އެދޭ ފަރާތްތަކުން ޚާއްޞަ ލިންކު (https://tinyurl.com/MasveriBahus) މެދުވެރިކޮށް ފޯމު ފުރިހަމަކުރުމަށްފަހު، ހުށަހަޅަންޖެހޭ ލިޔެކިޔުންތަކާ އެކު 2026 ނޮވެމްބަރު 5 ވާ ބުރާސްފަތި ދުވަހުގެ މެންދުރުފަހު 14:00 ގެ ކުރިން އެ މިނިސްޓްރީއަށް ހުށަހަޅަންޖެހޭނެއެވެ.

މި މުބާރާތުގެ އުސޫލުތަކާއި ގަވާއިދު އެ މިނިސްޓްރީގެ ރަސްމީ ވެބްސައިޓް ކަމަށްވާ އިން މިހާރު ޑައުންލޯޑް ކުރެވެން ހުންނާނެ ކަމަށްވެސް އެ މިނިސްޓްރީން މަޢުލޫމާތު ދެއެވެ. އަދި މި މުބާރާތާ ގުޅޭގޮތުން އިތުރު މަޢުލޫމާތެއް ސާފުކުރައްވަން ބޭނުންފުޅުވާ ފަރާތްތަކުން 3339223 ނުވަތަ 3339272 ނަންބަރު ފޯނާ ގުޅުއްވުމަށް ފިޝަރީޒް މިނިސްޓްރީން އެދެއެވެ.