ބައިތުލމާލުން ނަގާ ދަރަންޏަކީ ހުރިހާ ރައްޔިތުންގެ މައްޗަށް ބެހިގެންވާ ދަރަންޏަކަށް ވާތީ، އެ ދަރަނީގެ ފާފަ އެހެން ދަރަނިތަކަށް ވުރެ ބޮޑު ކަމަށް މިއަދުގެ ހުކުރު ޚުތުބާގައި ބުނެފި އެވެ.
ގައުމުގެ އިގްތިސާދީ ހާލަތު އަޑިއަޅާލައި، ދަރަނި ބޮޑުވެފައިވާ ކަމަށް ބުނަމުން އަންނަ ދަނޑިވަޅެއްގައި މިއަދު ރާއްޖޭގެ ހުރިހާ ހިސާބެއްގައި ދިން ޚުތުބާ ގެ މައުޟޫ އަކީ "ޙަޔާތުގެ ހުޅުކޮޅު ނިވުމުގެ ކުރިން ދަރަނި އަދާކުރާށެވެ" މިއެވެ.
ހުތުބާގައި ބުނީ، ދަރަނި ދިނުމާއި ދަރަނި ނެގުމަކީ، އިސްލާމްދީން ހުއްދަކުރާ ކަމެއް ކަމަށެވެ. ނަމަވެސް ދަރަނި ނަގާން ވާނީ އެ ދަރަނި އަދާކުރުމުގެ ނިޔަތުގައިކަމަށާއި، ދަރަނި ދޫކުރި ފަރާތަށް ގެއްލުމެއް ދިނުމުގެ ނިޔަތަކު ނޫންކަމަށެވެ.
ދަރަނި ނުދެއްކި، ޝަރީޢަތަށް މައްސަލަ ހުށަހެޅި، ތިމާ ކުށްވެރިވެ، އެ ކަމުގެ ސަބަބުން ދުނިޔެއާއި އާޚިރަތް ނަގައިލެވޭ ކަމަކަށް އެ ކަން ވެގެންނެއް ނުވާނެއެވެ. އެ ފަދަ ދަރަންޏެއް ނެގުމަށް ވުރެ، އައުލާކަން ބޮޑީ ލިބޭ އާމްދަނީއަކާ އެއްވަރަށް ޚަރަދުތައް ކުޑަކޮށް، އިޤްތިޞާދުކުރުމެވެ. ދަރަނި އަދާކުރުމުގެ ނިޔަތުގައި ދަރަނި ނަގާ މީހުންނަށް، ދަރަނި ދެއްކޭނެ ގޮތް، މާތް ﷲ މިންވަރުކޮށްދެއްވާނެއެވެ.
ޚުތުބާގައި ބުނީ ދަރަނީގެ މުޢާމަލާތަކީ، ޝަރުޢީ ޙުކުމްތަކެއް ހުރި ކަމެއް ކަމަށެވެ. އެގޮތުން ކިރިތި ގުރުއާނުގައިވާގޮތުން ދަރަނީގެ މުޢާމަލާތެއް ކުރާއިރު، އެ ކަމާބެހޭ ލިޔެކިޔުމާއި، ހެކި ހުންނާން ޖެހޭނެ ކަމަށް ޚުތުބާގައި ބަޔާންކޮށްފައި ވެއެވެ.
އެގޮތުން ދަރަނީގެ މުއާމަލާތް ލިޔެކިޔުމުގައި ބެހެއްޓުމާއި، ދަރަނީގެ ހެކި ހުރުމާއި، މިއިން ކަމެއް ނެތިއްޖެނަމަ ރަހުނު ބެހެއްޓުމަށް ގުރުއާނުގައި އަންގަވާފައިވާކަން ޚުތުބާގައި ފާހަގަކޮށްފައި ވެއެވެ. އަދި ދަރަނި ނުދައްކާ ދިގު ދެމިގެންދާ ނަމަ އެކަމުން ދެ ފަރާތަށް ވާނެ ގެއްލުން ވެސް ބަޔާންކޮށްފައި ވެއެވެ.
ދަރަނި ނަގަނީ ބައިތުލްމާލުންކަމުގައި ވަނީ ނަމަ، އެއީ އެންމެހައި ރައްޔިތުންގެ ޙައްޤުތައް އޭގައި ހިމެނޭ ދަރަންޏެކެވެ. އެހެންވެ، އެފަދަ ބޮޑެތި ދަރަނިތައް ނުދައްކައި ލަސްކުރުމަކީ އެ ކަމުގެ ފާފަ އެހެނިހެން ދަރަނިތަކަށް ވުރެ ބޮޑުވެދާނެ ކަމެކެވެ.
ޚުތުބާގައި ބުނީ ކިތަންމެ ކުޑަ ދަރަންޏެއް ކަމުގައި ވިޔަސް، އަދާނުކުރެވި އޮއްވައި، ދުނިޔެ ދޫކޮށް ދާން ޖެހުމަކީ ނުރައްކާތެރިކަމެއް ކަމަށެވެ. އަދި ތިމާގެ ދަރަންޏެއް އޮތުމަކީ ފާފަފުއްސެވުމަށް ހުރަސްއެޅިދާނެ ކަމެއް ކަމަށް ވެސް ބުނެފައި ވެއެވެ. އަދި ދަރަނި ނުދައްކާނަމަ، އެ ދަރަންޏެއް ދެއްކެންދެން އެމީހާގެ ހަށިގަނޑު އެލުވިފައިވާނެ ކަމަށް ވެސް ޚުތުބާގައިވެ އެވެ.
އެހެންވެ މީހަކު ދުނިޔެ ދޫކުރުމަށްފަހު، އޭނާގެ މައްޗަށް ކިތަންމެ ކުޑަ ދަރަންޏެއް އޮތަސް، އޭނާގެ ވާރުތަވެރީން އެ ދަރަނި އަދާކޮށްދޭން ޖެހޭނެ ކަމަށާއި، ޝަހީދުންނަކީ ނުހަނު ދަރަޖަ މަތިވެރި ބަޔަކަށް ވީހިނދު، އެ މީހުންނަށް ވެސް ދަރަނީގެ ފާފަ ނުފުއްސެވުމަކީ ދަރަނިވެރީންނާއި އެމީހުންގެ ވާރުތަވެރީން ސަމާލުވާން ޖެހޭ ކަމެއް ކަމަށް ވެސް ބުނެފައިވެ އެވެ.
