ރައީސް ޑރ. މުޙައްމަދު މުޢިއްޒުގެ މޭޔަރުކަމުގެ ދައުރަކީ، ފުރަމާލޭގެ ތާރީޚުގައި ފާހަގަކޮށްލެވޭ ހެޔޮ ބަދަލުތަކެއް ގެނެސްދިން ދައުރެކެވެ. ގިނަ ކަންތައްތަކެއް ކުރެއްވުމުގެ އަޒުމުގައި، ކަންތައްތަކެއް ހާސިލުކުރައްމުން ގެންދަވަނިކޮށް އެ މަގާމުން އިސްތިޢުފާދެއްވަން ޖެހިވަޑައިގަތީ ގައުމުގެ ވަލިއްޔުލްޢަމްރުގެ ޒިންމާތައް އެމަނިކުފާނާ މަތިކުރުމުން އެ ޒިންމާތަކާ ހަވާލުވެވަޑައިގަތުމަށެވެ.
މިއަދު ހުޅުމާލޭ ދޭއްގައި ހުޅުވި "އޮޅުހިޔާ" - ޕެޓް ކެއަރ ފެސިލިޓީއަކީ އެމަނިކުފާނުގެ މޭޔަރުކަމުގެ ދައުރުގައި ކުރެއްސެވި ތަސައްވުރެކެވެ. އެކަން ހަގީގަތަކަށް ހައްދަވައިދެއްވީ އެތައް ބައެއްގެ އާދޭހަށް އިޖާބަދެއްވުމަށެވެ. ރައްޔިތު މީހާ އެދޭ ކަންކަން ފުރިހަމަކޮށްދެއްވުމަކީ ހެޔޮ ވެރިކަމެއް ކޮށްދެއްވާ ވެރިއެއްގެ ފުށުން ފެންނާނެކަން ޔަގީން ސިފައެކެވެ.
އޮޅުހިޔާ ހުޅުވުމަށް ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވަމުން ރައީސް ޑރ. މުޢިއްޒު ވިދާޅުވީ އެ މަޝްރޫޢުއަކީ އެމަނިކުފާނު މާލޭ ސިޓީގެ މޭޔަރުކަމުގައި ހުންނެވި ދުވަސްވަރުން ފެށިގެން ހިންގެވުމަށް މަސައްކަތްޕުޅު ކުރެއްވި މަޝްރޫޢެއް ކަމަށެވެ. އެހެންނަމަވެސް އޭރުގެ ސަރުކާރުން އެއްބާރުލުން ނުދެއްވުމުން އެމަޝްރޫޢު ކުރިއަށް ނުގެންދެވުނީކަމުގައި ފާހަގަކުރެއްވިއެވެ. މިއީ ރައްޔިތުންގެ ސަރުކާރެއް ކަމަށާއި ސަރުކާރުން މަސައްކަތް ކުރާނީ ރައްޔިތުންގެ ފަޅީގައި ތިބެގެން ކަމަށް ވެސް ވިދާޅުވިއެވެ.
ރައީސް ޑރ. މުހައްމަދު މުޢިއްޒު - ޕެޓް ކެއަރ ފެސިލިޓީ ބައްލަވާލައްވަނީ
އޮޅުހިޔާ ހުޅުވުމަށް ބޭއްވި ރަސްމިއްޔާތަށް ފަހު "އަސްލު ޓީވީ" އަށް ދެއްވި ހާއްސަ އިންޓަރވިއެއްގައި މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑޮކްޓަރ ޢާއިޝަތު ރަމީލާ ވަނީ އެތަނުން ލިބެން ހުންނާނެ ބައެއް ޚިދުމަތްތައް ފާހަގަކުރައްވާފައެވެ. ޕެޓް ކެއަރ ފެސިލިޓީން ލިބޭނެ ޚިދުމަތްތަކުގެ ތެރޭގައި އާންމު ޗެކްއަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުން، ކާންދިނުމާއި، ބޭސްއެޅުން ހިމެނެއެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫން ވެސް ބަލި ދެނެގަތުމަށް ކުރާ ޓެސްޓުތައް ހެދުމުގެ އިތުރުން، އެނެސްތީސިއާ ބެލެހެއްޓުމާއި އޮޕަރޭޝަނަށްފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުން ހިމެނެއެވެ.
މިކަމަށް ހުޅުމާލެ ދެވަނަ ފިޔަވަހިން 5،000 އަކަފޫޓުގެ ބިމެއް ވަނީ ޚާއްސަކޮށްފައެވެ. މިމަޝްރޫއުގެ ދަށުން ގާއިމުކުރި ޝެލްޓަރގައި ބުޅަލާއެކު ޢާންމުންނަށް ވަގުތު ހޭދަކޮށްލެވޭ ގޮތަށް ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއް ވެސް ހުޅުވާނެއެވެ. މިމަޝްރޫއުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ފިޔަވަހިތަކަކަށް ބަހާލައިގެންނެވެ. އެގޮތުން ކުރިއަށް އޮތްތަނުގައި ދޫނި ފަދަ ރާއްޖޭގައި އޮޅުކޮށްގެން ގެންގުޅޭ ދިރޭތަކެތި ބެލެހެއްޓޭނެ އިންތިޒާމުވެސް ހަމަޖެހިގެންދާނެ ކަމަށެވެ. މިމަޝްރޫއަށް ޖުމްލަ 18،000 އަކަފޫޓުގެ ބިމެއް ކުރިއަށް އޮތްތަނުގައި ހަމަޖެހިގެންދާނެ ކަމަށް ވެސް ސިޓީ ކައުންސިލުން ބުނެއެވެ.
ރައީސް ޑރ. މުހައްމަދު މުޢިއްޒު - ޕެޓް ކެއަރ ފެސިލިޓީ ބައްލަވާލައްވަނީ
މިމަސައްކަތުގެ ސަބަބުން މާލެ ސަރަހައްދުގައި، އެތައް އަހަރުތަކެއް ވަންދެން ރައްޔިތުންނަށް ކަންބޮޑުވުމަކަށް ވެފައިވާ ބުޅާ ގިނަވުމުގެ މައްސަލައަށް ހައްލެއް ލިބިގެންދާނެއެވެ. އަދި ރަށުތެރެއާ މަގުތައް ހަޑިވެ ނަޖިސްވުން ކުޑަކުރެވި، ބުޅާ ބެލެހެއްޓުންވެސް އޯގާތެރިކަމާ އަޅައިލުމާއެކު އިންތިޒާމު ކުރެވޭނެ ކަމަށް ސަރުކާރުން ބުނެއެވެ.
މިއީ އެތަކެއް އަހަރުތަކެއް ވަންދެން މާލެ ސަރަހައްދުގައި ދިރިއުޅެމުންދާ ރައްޔިތުންގެ ހައްލެ ނުލިބި އޮތް ކަންބޮޑުވުމަކަށް، ރައީސް ޑރ. މުޢިއްޒު ހޯއްދަވައި ދެއްވި ދާޢިމީ ހައްލެކެވެ.
