ދަރިމައިވުމުގައި މައްސަލަ ދިމާވެފައިވާ އާއިލާތަކަށް އާސަންދައިގެ ދަށުން އައިވީއެފް ޚިދުމަތް ދިނުމުގެ ދެވަނަ ބުރުގައި ސަރުކާރުން އެހީދޭ މީހުންގެ ނަންތައް އާންމު ކޮށްފިއެވެ.
އައިވީއެފް ޚިދުމަތް ސަރުކާރުގެ އެހީގައި ދިނުމަކީ ސަރުކާރުގެ ފުރަތަމަ 14 ހަފްތާގެ ތެރޭގައި ހާސިލް ކުރެއްވުމަށް ކަނޑައަޅުއްވާފައިވާ ވަޢުދުތަކުގެ ތެރޭގައި ހިމެނޭ މަސައްކަތެކެވެ. "އައ.ިޔ.ޫއައި" އަދި "އައ.ިވ.ީއެފް"ގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމަށްޓަކައ،ި އެކުލަވާލި ޕްލޭންގެ ދަށުން މިހާރު ވަނީ އެ ބުރުގެ މީހުންނަށް އެ ޚިދުމަތް ދީފައެވެ.
އައިވީއެފް ޚިދުމަތް އަމިއްލަ އަށް ހޯދުމަށް ދަތިވާ ފަރާތްތަކަށް، ސަރުކާރުގެ އެހީގައި އެ ޚިދުމަތަށް އެދުމުގެ ފުރުސަތު ހުޅުވާލި މުއްދަތު ހަމަވީ މި އަހަރުގެ ޖުލައި 31 ގައެވެ. އެ މުއްދަތާ ހަމައަށް 215 މީހުން އެ ޚިދުމަތަށް އެދިފައިވާ ކަމަށް އެންއެސްޕީއޭއިން އާންމުކުރި އިއުލާނުގައި ބުނެފައި ވެއެވެ.
އެންއެސްޕީއޭއިން މިހާރު އެ ޚިދުމަތް ދޭނެ ފަރާތްތަކުގެ ލިސްޓު އާންމުކޮށްފައިވާއިރު އެ ލިސްޓުގައި ހިމަނާފައި ވަނީ އެކަމަށް އެދި ހުށަހެޅި 215 މީހުންގެ ތެރެއިން ޝަރުތު ހަމަވާ 63 މީހުންނެވެ.
ކޮންމެ އަހަރަކު ވެސް 100 މީހުންނަށް އެހީ ދިނުމަށް ސަރުކާރުން ނިންމާފައިވާއިރު، ޝަރުތު ހަމަވެ ޚިދުމަތް ދޭނެ މީހުން ކަނޑައެޅީ އެ އަދަދަށް ބަހާލައިގެންނެވެ.
އެންސްޕާއިން އާންމުކުރި ލިސްޓުގައި މީހުންގެ މައުލޫމާތު ހިމަނާފައިވަނީ ފޯމު ނަމްބަރާއި އެކުގައެވެ. މި ލިސްޓުގައި ޝަރުތު ހަމަވެ ފުރުސަތު ލިބުނު މީހުންގެ އިތުރަށް ޝަރުތު ހަމަނުވާ މީހުންނަށް ވެސް އޭގެ ސަބަބު އެނގޭނެ ގޮތަށް ހިމަނާފައި ވެއެވެ.
މި ޚިދުމަތުގެ ދެވަނަ ބުރުގައި ފުރުސަތު ލިބުނު ފަރާތްތަކުން މި މަހުގެ ނިޔަލަށް ފަރުވާގެ ޕްލޭން ހިިއްސާކުރުމަށް ވެސް އެންސްޕާއިން އެދިފައިވެ އެވެ.
