އާސަންދަ ސްކީމްގެ ދަށުން ދޫކުރާ 250 ބޭހުގެ އަގު ހެޔޮކުރުމަށް ނޭޝަނަލް ސޯޝަޕް ޕްރޮޓެކްޝަން އޭޖެންސީ (އެންސްޕާ) އިން މިއަދު ބުނެފި އެވެ.
އެންސްޕާއިން މިކަމާ ގުޅިގެން ނެރުނު ބަޔާނެއްގައި ބުނީ އެ ބޭސްތަކުގެ އަގަށް ބަދަލު ގެންނަނީ ރައްޔިތުންނަށް ރަނގަޅު ފެންވަރުގެ އަސާސީ ސިއްހީ ހިދުމަތް ފޯރުކޮށްދިނުމަށްޓަކައި ދެމުންދާ 'އާސަންދަ ސްކީމް' އަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތްތަކެއް ފޯރުކޮށްދެ ނިޒާމަކަށް ހެދުމަށް ކުރަމުންދާ މަސައްކަތްތަކުގެ ތެރެއިން ކަމަށެވެ.
އެންސްޕާއިން ބުނީ ބޭހުގެ އަގަސް ބަދަލު ގެނައުމުގެ މަސައްކަތް ކުރިއަށްދާނީ އެކި ފިޔަވަހިތަކަށް ބަހާލައިގެން ކަމަށެވެ. އެގޮތުން އަންނަ މަހުގެ 1 އިން ފެށިގެން 87 ބޭހެއްގެ އަގަށް ބަދަލު ގެނައުމަށް ނިންމާފައިވާ ކަމަށް އެ އޭޖެންސީން ބުނެފައިވެ އެވެ. 126 ބޭހުގެ އަގަށް އަންނަ މަހުގެ 24 އިން ފެށިގެން ބަދަލު ގެނެވޭނެ ކަމަށް ވެސް ބުނެފައިވެ އެވެ.
އެންސްޕާއިން ބުނީ އަގު މުރާޖާ ކުރެވޭ ބޭހުގެ ތަފްސީލް، އެ ތާރީހުތަކުން ފެށިގެން އާސަންދަ ކުންފުނީގެ ވެބްސައިޓުން ފެންނަން ހުންނާނެ ކަމަށެވެ. އަދި މި ފިޔަވަޅުތަކުގެ ސަބަބުން، ކުރިން އަގުބޮޑުކޮށް ވިއްކަމުން ދިޔަ ބޭސްތަކުގެ އަގު ހެޔޮކުރެވި، އާސަންދަ ސްކީމްގެ ހަރަދު ކުރެވިގެންދާނެ ކަމަށް އެންސްޕާއިން ބުންޏެވެ. އެގޮތުން، ބޭހަށް ކުރާ ހަރަދުގެ ތެރެއިން އަހަރަކަށް ގާތްގަނޑަކަށް 220 މިލިއަން ދިވެހި ރުފިޔާ ސަލާމަތް ކުރެވޭނެ ކަމަށެވެ.
އެންސްޕާއިން ވަނީ އެ ބަދަލުތަކާ ގުޅުގެން އާސަންދަ މެދުވެރިކޮށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމަށް އެއްވެސް ބަދަލެއް ނައިސް، އެ ބޭސް ލިސްޓުގައި ހިމެނޭ ބޭސްތަކުގެ ކޮންމެވެސް އެއް ބްރޭންޑެއް އެސްޓީއޯ ފާމަސީތައް މެދުވެރިކޮށް އިތުރު އެއްވެސް އަގަކާ ނުލާ ބޭސް ލިބޭނެ އިންތިޒާމްތައް ހަމަޖައްސާފައިވާ ކަމަށް ވެސް ބުނެފަ އެވެ. އަދި އާސަންދަ ސްކީމްގައި ރެޖިސްޓްރީ ކޮށްފައިވާ އަމިއްލަ ފާމަސީތަކުގެ ތެރެއިން ވެސް އެ ބޭސްތައް ވިއްކުމަށް ރެޖިސްޓާ ކޮށްފައިވާ ފާމަސީތައް މެދުވެރިކޮށް ވެސް އިތުރު އަގަކާ ނުލާ ބޭސް ލިބޭނެ އިންތިޒާމްތައް ހަމަޖެހިފައިވާ ކަމަށް އެންސްޕާއިން ވަނީ ބުނެފަ އެވެ.
އެންސްޕާގެ ލިސްޓާ ހިލާފަށް ހިދުމަތްދޭ މަރުކަޒަކުން ބޭސް ދޫކުރާކަން ފާހަގަކުރެވިއޖެނަމަ އެކަން "ޝިކާވަތި" ޗެޓްލައިން 7951400 އަށް ރިޕޯޓު ކުރުމަށް އެ އޭޖެންސީން ވަނީ އެދިފަ އެވެ.
