މިއަދަކީ، ފަލަސްތީނު ރައްޔިތުންނާއެކު ދުނިޔެ އޮތްކަން ހާމަކުރުމުގެގޮތުން ދުނިޔޭގައި ފާހަގަކުރާ، ފަލަސްތީނު ރައްޔިތުންނާއެކު ބައިނަލްއަޤްވާމީ އެއްބައިވަންތަކަމުގެ ދުވަހެވެ.
މި ދުވަހަކީ، 1977 ވަނަ އަހަރު އދއިން ކަނޑައެޅި ދުވަހެކެވެ.
މި ދުވަހުގެ ބޭނުމަކީ، ފަލަސްތީނު ރައްޔިތުންނަށް އެމީހުންގެ ހައްގުތައް ހޯދައިދިނުމަށް ދުނިޔޭގެ ފެންވަރުގައި ތާއީދު ކުރުމަށް ބާރުއެޅުމެވެ. އެގޮތުން، ފަލަސްތީނު މީހުންގެ ކަންކަން އެމީހުން އަމިއްލައަށް ނިންމުމުގެ ހައްގާއި، މިނިވަންކަމާއި، ފަލަސްތީނުގެ ރެފިއުޖީންގެ މައްސަލައަށް އިންސާފުވެރި ހައްލެއް ހޯދައިދިނުން ހިމެނެއެވެ.
މި މަސައްކަތުގެ ދަށުން، ފަލަސްތީނަކީ މިނިވަން މުސްތަގިއްލު ގައުމެއް ކަމަށް މިހާތަނަށް ދުނިޔޭގެ 146 ގައުމުން ގަބޫލުކޮށްފައި ވެއެވެ.
ފަލަސްތީނުގެ ބިމަށް ވެރިވެގެންފައިވާ އިސްތިއުމާރީ އިސްރާއީލުން ޣައްޒާއާ ދެކޮޅަށް 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަނގުރާމަ ފެށިފަހުން އެކަނިވެސް، 9 ގައުމަކުން ފަލަސްތީނުގެ މިނިވަން ދައުލަތް ގަބޫލުކޮށްފައި ވެއެވެ. އެ ގައުމުތަކަކީ، އަރްމީނިއާ، ސްލޮވީނިއާ، އަޔަރލޭންޑް، ނޯރވޭ، ސްޕެއިން، ބަހަމާސް، ޓްރިނިޑާޑް އެންޑް ޓޮބޭގޯ، ޖަމައިކާ އަދި ބާރބަޑޯސްއެވެ.
ފަލަސްތީނުގެ މިނިވަން ދައުލަތް ގަބޫލުކުރާ ދުނިޔޭގެ ގައުމުތައް އިތުރުވަމުންދާ ވަރަކަށް، އިސްތިއުމާރީ އިސްރާއީލަށް ޕްރެޝަރ ބޮޑުވެ، އިސްތިއުމާރަށް ޖަވާބުދާރީ ކުރުވުމާއި، ދެދައުލަތުގެ ހައްލަށް ދިއުމަށް، ޚާއްސަކޮށް ހުޅަނގުގެ ގައުމުތަކަށް ދަނީ މަޖުބޫރުވަމުންނެވެ.
އިސްރާއީލުގެ އިސްތިއުމާރަށް އެތައް އަހަރެއް ވީފަހުން، ގުދުސްއަކީ ފަލަސްތީނުގެ ވެރިރަށް ކަމަށް ކަނޑައަޅުއްވައި، ފަލަސްތީނުގެ މިނިވަން މުސްތަގިއްލު ދައުލަތް 1988 ވަނަ އަހަރު އިޢުލާން ކުރެއްވީ ފަލަސްތީނުގެ އޭރުގެ ރައީސް މަރްޙޫމް އައްސައްޔިދު ޔާސިރު އަރަފާތެވެ. އެއީ، ފުރަތަމަ އިންތިފާޟާގެ ދުވަސްވަރެވެ.
ޔާސިރު އަރަފާތުގެ އިޢުލާނާއެކު ދުނިޔޭގެ 80 އަށްވުރެ ގިނަ ގައުމުން ފަލަސްތީނުގެ މިނިވަން ދައުލަތް ގަބޫލުކުރިއެވެ. އޭގެ ތެރޭގައި ގިނައީ، އެފްރިކާ، އޭޝިޔާ، ލެޓިން އެމެރިކާ އަދި އަރަބި ބައްރުގެ ގައުމުތަކެވެ.
އޭގެފަހުން، ފަލަސްތީނުގެ މިނިވަން ދައުލަތް ގަބޫލުކުރާ ގައުމުތައް ދިޔައީ އިތުރުވަމުންނެވެ.
އދގެ ނިޒާމުގެ ތެރެއިން ފަލަސްތީނުގެ މިނިވަން ދައުލަތް ރަސްމީގޮތުން ކަނޑަނޭޅިއޮންނާތީ، ފަލަސްތީނަށް މިހާރު ދީފައި އޮންނަނީ އޮބްޒާވަރެއްގެ ދަރަޖައެވެ. އދގެ ހުރިހާ އޭޖެންސީތަކެއްގައި ފުރިހަމަ މެމްބަރު ގައުމެއްގެ ގޮތުގައި ފަލަސްތީނު ތަމްސީލު ކުރެއެވެ.
ފަލަސްތީނަކީ މިނިވަން ދައުލަތެއް ކަމަށް އދގެ ތެރެއިން ރަސްމީގޮތުން ބަލައިގަތުމަށް އެންމެ ބޮޑަށް ދެކޮޅު ހަދަމުންގެންދަނީ އިސްތިއުމާރީ އިސްރާއީލުންނެވެ. އެކަމުގައި އިސްރާއީލަށް ވާގިވެރިވަނީ އެމެރިކާއާއި، ހުޅަނގުގެ ބައިވެރިންނެވެ.
