ސިޔާސީ ޕާޓީތައް ހިންގާ ގޮތާއި، ސިޔާސީ ހަރަކާތްތައް ރާވާ، އިންތިޒާމު ކުރާ ގޮތް ވާދަވެރިންނަށް ދަސްކޮށްދޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕަރސަން އަބްދުއްރަހީމް އަބްދުﷲ ވިދާޅުވެއްޖެއެވެ.
މިއަދު ބޭއްވި ޕީއެންސީގެ އެތެރޭގެ އިންތިޚާބަށް ފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ޖަވާބުދެއްވަމުން އަބްދުއްރަހީމް ވިދާޅުވީ ޕީއެންސީއަކީ މިވަގުތު ދިވެހިރާއްޖޭގައި އޮތް އެންމެ ބޮޑު ޕާޓީ ކަމަށެވެ. އަދި އެ ޕާޓީން މަސައްކަތް ކުރާނީ ޕާޓީ އިތުރަށް ވަރުގަދަ ކުރުމަށް ކަމަށެވެ.
ރައީސް މުއިއްޒު ބޭނުންފުޅުވީ 75،000 މެންބަރުން ތިބި ޕާޓީއަކަށް އަޅުގަނޑުމެން ޕާޓީ ހަދަން. އެހެން ނަމަވެސް އެމަނިކުފާނު ބޭނުންވި ވަރަށްވުރެ ވެސް ޕާޓީ މިވަނީ ބޮޑުވެފައި. އިރާދަކުރެއްވިއްޔާ އަޅުގަނޑުމެން މި ބަލަނީ، އެއްލައްކަ މީހުން އަޅުގަނޑުމެންގެ ޕާޓީއަށް ހަމަވެގެންދާނެ ކަމަށް - އަބްދުއްރަހީމް އަބްދުﷲ
އަބްދުއްރަހީމް ވިދާޅުވީ އެ ޕާޓީއަކީ ޑިމޮކްރަސީގެ ހަމަތަކަށް ވެސް އެންމެ ފުރިހަމައަށް މިހާރު އަމަލުކުރަމުންދާ ޕާޓީ ކަމަށެވެ. އެހެން ކަމުން އެހެން ޕާޓީތަކުން ޕީއެންސީ ނަމޫނާއަކަށް ބަލަން ޖެހިފައިވާ ކަމަށް ވެސް އަބްދުއްރަހީމް ވިދާޅުވިއެވެ.
އަބްދުއްރަހީމްގެ އިތުރުން އެ ޕާޓީގެ ލީޑަރޝިޕްގެ ގިނަ ބޭފުޅުން ވަނީ އެކަމަށް އެއްބަސްވެވަޑައިގެން ވާޙަކަ ދައްކަވާފައެވެ.
ޕީއެންސީގައި މިހާރު ތިބީ ހިތުން ރުހުމުން ހަމަ އެ ޕާޓީ އަށް ވަން މީހުން ކަމަށް ވެސް ޕާޓީގެ ޗެއާޕަރސަން ވިދާޅުވިއެވެ.
އަބްދުއްރަހީމް ވިދާޅުވީ މިދިޔަ އަހަރުގެ ނޮވެމްބަރު 17 ގައި މިހާރުގެ ވެރިކަން ފަށައިގަތްއިރު، އެ ޕާޓީގެ ދަފްތަރުގައި ތިބީ 3،000 އެއްހާ މެމްބަރުން ކަމަށެވެ.
ނަމަވެސް، މިއަދު ޕީއެންސީގެ ދަފްތަރު އަހަރެއްގެ ތެރޭގައި އެއް ލައްކަ އަށް އަރާފައި ވަނީ ރައީސް މުއިއްޒުގެ ދުރުވިސްނޭ ސިޔާސަތުތަކުގެ ސަބަބުން ކަމަށް އަބްދުއްރަހީމް ވިދާޅުވިއެވެ.
