ސަރުކާރު ހިންގާ މައި ޕާޓީ ޕްރޮގްރެސިވް ކޮންގްރެސް ކޯލިޝަން (ޕީއެންސީ) އަށް ލިބެމުން އަންނަ ތަރްހީބު ކުރިޔަށްވުރެ އިތުރުވެފައިވާ ކަން މިއަދު ބޭއްވި އެތެރޭގެ އިންތިޚާބުން ހާމަވެއްޖެ ކަމަށް އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވެއްޖެއެވެ.
ފަޒުލް މިފަދައިން ވިދާޅުވީ އަސްލު ޓީވީއަށް ދެއްވި ޚާއްސަ އެކްސްކްލޫސިވް އިންޓަވިއުއެއްގައެވެ.
މިއަދު ކުރިޔަށް ދިޔަ އެތެރޭގެ އިންތިޚާބުގައި ޕާޓީއަށް ލިބެމުން އަންނަ ތަރްހީބް އިތުރުވެފައިވާ މަންޒަރު ފެނިފައިވާ ކަމަށާއި، އެކަން އިންތިޚާބު އޮތް މަރުކަޒު ދަރުބާރުގެ ތެރެއިން ފެނުނު ކަމަށެވެ. ފަޒުލް ވިދާޅުވީ މުޅި ދަރުބާރުގެ އާއި އެ ތަން ހިމެނޭ ސަރަހައްދު އާއްމު މެމްބަރުންނާއި އެކީ ތޮއްޖެހިފައި އޮތް މަންޒަރު އިންތިކާބު ކުރިއަށް ދިޔަ ވަގުތުތަކުގައި ފެނިގެން ދިޔަ ކަމަށެވެ.
"އަޅުގަނޑަ ފާހަގަވީ މި އިންތިހާބުން ވާދަވެރިކަން. އަޅުގަނޑުމެންގެ ޕާޓީއަށް އާންމު މެންބަރުން ގެ އޮތް ޝައުގުވެރިކަން. " އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު
ފަޒުލް ވިދާޅުވީ ޕާޓީގެ މެމްބަރުންގެ އަދަދު 90،000 ވުރެ އިތުރުވެފައިވާ ކަމަށާއި، މިކަމުންވެސް ދައްކައިދެނީ ޕާޓީއަށް ރައްޔިތުންގެ އޮތް އިތުބާރު ކަމަށެވެ. އިންތިހާބުގެ ކަންކަން ކުރިޔަށް ދިޔައީ ވަރަށް އޮމާންކޮށް އެއްވެސް ހަމަނުޖެހުމެއް ނެތި ކަމަށް ވިދާޅުވިއެވެ.
އަސްލު ޓީވީ އާއި ވާހަކަދައްވަމުން އިންތިހާބުގެ ކަންތަކުގައި އިސްކޮށް ހަރަކާތެރިވި މުހައްމަދު ލަމްއާން ވިދާޅުވީ ޕާޓީގެ އެތެރޭގެ މި އިންތިހާބަކީ އެންމެ ގިނަ އާއްމު މެންބަރުން ބައިވެރިވި އިންތިހާބު ކަމަށާއި، މިއީ ވަރަށް ކާމިޔާބު އިންތިހާބެއް ކަމަށެވެ.
ލަމްއާން ވިދާޅުވީ ވާދަވެރި އިންތިހާބަކަށްވީ ނަމަވެސް ނިމިގެން ދިޔައީ ވަރަށް އެކުވެރިކޮށް ކަމަށާއި، މިއީ ޕާޓީ އަށް ލިބިގެން ދިޔަ ވަރަށް ބޮޑު ކާމިޔާބެއް ކަމަށެވެ.
ވެރިކަމަށް އައި އިރު ޕީއެންސީއަކީ 3،000 މެމްބަރުން ހަމަނުވާ ޕާޓީއެއް ކަމަށާއި، ނަމަވެސް ވެރިކަމަށް އަހަރު ނުވަނިސް، ޕާޓީގެ ދަފްތަރުގައި 64،000 ވުރެ ގިނަ މެމްބަރުން އެބަތިބި ކަމަށް ޕީއެންސީ ޕާލިމެންޓްރީ ގްރޫޕް އިން ވަނީ ބުނެފައެވެ.
