އިތުރު އެއްވެސް ދައްޗެއް ނެތް ނަމަ، މި ހަފުތާ ނިމުމުގެ ކުރިން "ގެދޮރުވެރިޔާ" ސްކީމްގެ ފްލެޓުތައް ލިބޭ މީހުންގެ ލިސްޓު އާންމު ކުރައްވާނެ ކަމަށް މިނިސްޓަރ އޮފް ހައުސިން ލޭންޑް އެންޑް އަރބަން ޑިވެލޮޕްމަންޓް ޑރ. އަލީ ހައިދަރު ވިދާޅުވެއްޖެއެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި "ގެދޮރުވެރިޔާ" ސްކީމްގެ ފުރަތަމަ ފިޔަވަހީގެ ދަށުން ދޫކުރަން ނިންމާފައިވާ 4،000 ފުލެޓް ލިބޭ މީހުންގެ ލިސްޓު އާންމު ކުރުމުގެ އެންމެ ފަހުގެ މައުލޫމާތު ހިއްސާކުރައްވާ 'އަސްލު ޓީވީ'އާ ވާހަކަދައްކަވަމުން މިނިސްޓަރު ވިދާޅުވީ މި ފެށޭ ހަފުތާގެ ތެރޭގައި އިތުރު އެއްވެސް ހުރަހެއް ދިމާ ނުވާނަމަ އެ ލިސްޓު އާންމު ކުރާނެ ކަމަށެވެ.
ކުރީގެ ރައީސް ސޯލިހްގެ ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކަށް ކުރިމަތިލުމުގެ ފުރުސަތު ހުޅުވާލުމުން 4،000 ފްލެޓަށް، 20,697 ފޯމު ހުށަހަޅާފައިވެއެވެ. އޭގެ ތެރެއިން 13،000 އަށް ވުރެ ގިނަ މީހުންގެ ޝަރުތު ހަމަވާ ކަމަށް ނިންމިއެވެ. "ގެދޮރުވެރިޔާ" ސްކީމުގެ ދަށުން ޝަރުތު ހަމަވި ނަމަވެސް ފުރަތަމަ ދޫކުރާ 4،000 ފްލެޓު ނުލިބޭ މީހުންނަށް ލިޔުމެއް ދިނުމަށެވެ. އަދި އެ ލިޔުން 9،000 އަށް ވުރެ ގިނަ މީހުންގެ ގެދޮރުވެރިޔާ ޕޯޓަލްގައި ހިމަނާނެ ކަމަށް ބުނެފައިވެއެވެ.
އޭސީސީން ހާމަކުރި ގޮތުގައި ތަހުގީގުގައި ޖުމްލަ 4،048 ފޯމެއް ބެލި އިރު، ފޯމުތަކުގެ ތެރެއިން އެއްވެސް މައްސަލައެއް ނެތި ޝަރުތު ހަމަވެފައިވަނީ %20.7 ފޯމުގެއެވެ. އަދި %19.7 މީހުންނަކީ ޝަރުތު ހަމަވި ނަމަވެސް މައްސަލަތައް ހުރި ފޯމެވެ. އަދި ޝަރުތު ފުރިހަމަ ނުވާ %59.6 ފޯމް ހުރިކަން ފާހަގަވާ ކަމަށް އޭސީސީން ބުންޏެވެ. އެއީ 2،000 އަށް ވުރެ ގިނަ ފޯމެވެ. ޝަރުތު ހަމަވި ނަމަވެސް މައްސަލަތައް ހުރި ފޯމުތަކުން ފާހަގަ ކުރެވުނު ކަންކަމުގެ ތެރޭގައި ފޯމްގައި ދީފައިވާ މައުލޫމާތު ފުށުއެރުމާއި ޕޮއިންޓް ދިނުމުގައި މައްސަލަތައް ހުރުމާއި ހާއްސަ އެހީއަށް ބޭނުންވާ ފަރާތްތަކުގެ ބަޔަށް، އުސޫލާ ހިލާފަށް ޕޮއިންޓް ދިނުން ހިމެނެއެވެ.
