ރާއްޖޭގެ އިތުރު ސަރަހައްދުތަކެއް ޚިމާޔަތް ކުރުމަށް ދަނީ މަސައްކަތް ކުރަމުން: ތިމާވެއްޓާ ބެހޭ ވުޒާރާ

މި އަހަރު ރާއްޖޭގެ އިތުރު ސަރަހައްދުތަކެއް ޚިމާޔަތް ކުރުމަށް މަސައްކަތް ކުރަމުންދާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން ބުނެފިއެވެ.

އެންވަޔަރަންމަންޓް މެނޭޖްމަންޓު އެންޑް ކޮންސަރވޭޝަން ޑިޕާޓްމަންޓުގެ ޑިރެކްޓަރ އަޙްމަދު ސާން ވިދާޅުވީ، މިހާތަނަށް އައިއިރު، 93 ސަރަހައްދެއް ހިމާޔަތްކޮށްފައިވާ ކަމަށާއި، ތިމާވެށި ހިމާޔަތް ކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ކޮންމެ އަތޮޅެއްގައި ތިމާވެށީގެ ގޮތުން މުހިންމު ސަރަހައްދުތަކެއް ދެނެގަނެ އެތަންތަން ހިމާޔަތްކުރުމަށް އަންނަނީ، މަސައްކަތް ކުރަމުން ކަމަށެވެ. އަދި ބައެއް ސަރަހައްދުތައް ޤަވާއިދުން މޮނިޓަރ ކުރަމުންދާ ކަމަށް ވެސް ސާން ވަނީ ވިދާޅުވެފައެވެ.

ހިމާޔަތްކޮށްފައިވާ ސަރަހައްދުތަކަކީ ރާއްޖޭގެ ނިސްބަތުން ބަލާނަމަ ވަރަށް ކުޑަ އިންސައްތައެއް ކަަމަށާއި، މިއަހަރު އިތުރު ސަރަަހައްދުތަކެއް ހިމާޔަތްކުރުމަށް މަސައްކަތް ކުރަމުންދާ ކަމަށާއި، އެގޮތުން އިތުރު 2 ސަރަހައްދެއް ހިމާޔަތްކުރުމަށް ނިންމާފައިވާ ކަމަށް ސާން ވަނީ ވިދާޅުވެފައެވެ. އެއީ އދ. އަތޮޅު ސަރަހައްދުގެ އިތުރުން ހދ. އަތޮޅުގެ ސަރަހައްދުތަކެއްކަމށް ސާން ވަނީ ވިދާޅުވެފައެވެ.

މީގެ އިތުރުން ތ.އަތޮޅުގެ ސަރަހައްދުތަކެއް ހިމާޔަތް ކުރުމަށް ސާރވޭ ކުރުމުގެ މަސައްކަތްތައް މި އަހަރަށް ވަނީ ޕްލޭންކޮށްފައެވެ.