އާސަންދައަކީ ދިވެހިރައްޔިތުންނަށް ސިއްހީ ފަރުވާގެ ހަރަދުތައް ހަމަޖައްސައިދިނުމަށްޓަކައި އެކުލަވައިލެވިފައިވާ ޔުނިވާސަލް ހެލްތު ސްކީމެކެވެ. މި ސްކީމްގެ ސަބަބުން ދުޅަހެޔޮ ސިއްހަތެއްގައި ހުރުމަށްޓަކައި ކޮންމެހެން ބޭނުންވާ ސިއްހީ ހިދުމަތްތައް ރާއްޖޭގެ ހުރިހާ ރައްޔިތުންނަށް ހަމަހަމަކަމާއެކު ހޯދޭނެ މަގު ތަނަވަސްވެގެން ދެއެވެ. މިކަމުގެ ނަތީޖާއެއްގެ ގޮތުން ސިއްހީ ހިދުމަތްތަކަށް އަމިއްލަ ޖީބުން ކުރަންޖެހޭ ހަރަދުތައް ކުޑަވެ، އާއިލާތަކަށް ކުރިމަތިވާ އިގްތިސާދީ ލޮޅުންތަކުން ސަލާމަތްވެތިބުމަށް މަގުފަހިވެގެން ގޮސްފައިވެއެވެ.
"އާސަންދަ ސްކީމް" ހަރުދަނާކުރުމުގެގޮތުން
އިސްރާފްކުޑަ ނިޒާމަކަށް ބަދަލުކޮށް، ދެމެހެއްޓެނިވި ގޮތެއްގައި ރައްޔިތުންނަށް
އެންމެ ފައިދާކުރާ، ފެންވަރު ރަނގަޅު ޚިދުމަތްތަކެއް ފޯރުކޮށްދެވޭ ނިޒާމަކަށް
ހެދުމަށްޓަކައި މުހިއްމު މަސައްކަތްތަކެއް ދަނީ ކުރެވެމުންނެވެ.
މިގޮތުން
މި ގެނެވުނު ބަދަލާއެކު، ޞިއްޙީ ޚިދުމަތްދޭ މަރުކަޒުތަކުން ޚިދުމަތް ހޯދާ
ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތްތަކުން ހޯދާ
ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރަންސަށް އިސްކަންދިނުމަށް
ހަމަޖައްސާފައިވާ ކަމަށް އެންސްޕާއިން ވަނީ ބުނެފައެވެ.
އެގޮތުން
ފުރަތަމަ ފިޔަވަހީގައި މިގެނެވުނު ބަދަލާއި ގުޅިގެން "އައުޓް-ޕޭޝަންޓް"
ގެ ޚިދުމަތްތައް ހޯއްދަވާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ
ފަރާތެއްނަމަ، ފުރަތަމަ ބިލްކުރާނީ ޕްރައިވެޓް އިންޝުއަރަންސަށް ކަމަށް
އެންސްޕާއިން ވަނީ ބުނެފައެވެ.
އަދި
އިންޝުއަރެންސްގެ ޕެކޭޖްތަކުގެ ލިމިޓް ހަމަވުމުން ނުވަތަ އިންޝުއަރަންސް އިން އެ
ޚިދުމަތެއް ކަވަރު ނުކުރާނަމަ، މިހާރެކޭވެސް އެއްގޮތަށް އާސަންދަ ސްކީމުން
އެޚިދުމަތަކަށް ކަވަރޭޖް ލިބޭނެއެވެ. މިކަން ތަންފީޒުކުރުމަށް ހަމަޖެހިފައިވަނީ އެކި ފިޔަވަހިތަކަށް
ބަހާލައިގެން، "އައުޓް-ޕޭޝަންޓް" އަދި "އިން-ޕޭޝަންޓް" ގެ
ޚިދުމަތްތައް ވަކިން ކަމަށް އެންސްޕާއިން ބުނެއެވެ.
މި ބަދަލާ ގުޅިގެން ގިނަ ބަޔަކަށް ހަގީގަތުގައި މި ވަނީ ކީއްކަން އޮޅިއްޖެއެވެ. އެއްބަޔަކު އެ ސްކީމަށް ގެނައި ބަދަލާއެކު "ދިވެއްސަކަށް ވީތީ ލިބެންޖެހޭ" އާސަންދަ ދިނުން ސަރުކާރުން ހުއްޓައިލީކަމަށް ބުނެ ކަންބޮޑުވުން ފާޅުކުރަންފަށައިފިއެވެ. އަދި އަނެއްބަޔަކު އަމިއްލަ އިންޝުއަރެންސް ހޯދުމުގެ ގާބިލުކަން ހުރެ އެ އިންޝުއަރެންސް ގެންގުޅޭ މީހުންނަށް ދެން އާސަންދަ ލިބޭނީ ވެސް އެ އިންޝުއަރެންސް ލިމިޓް ހަމަވުމުން އެކަނި ކަމަށް ބުނެ ކަންބޮޑުވުން ފާޅުކުރަން ފަށައިފިއެވެ. އަދި ބައެއް ފަރާތްތަކުންވަނީ އަމިއްލަ އިންޝުއަރެންސް ސްކީމަށް އިސްކަން ދޭ ފެށުމުން، އާސަންދަ ނުލިބި ރައްޔިތުން ބޮޑެތި އަދަދުން ޑޮކްޓަރަށް ދައްކަން ފައިސާ ދައްކަންޖެހިފައިވާ ކަމަށް ވެސް ބުނެފައެވެ.އަދި މި ގެނެވުނު ބަދަލު އޮވާލައިގެން އެހެން ގޮތަކަށް ގެނައުމަށް އިދިކޮޅު ސިޔާސީ ފަރާތްތަކުންވެސް އަންނަނީ މަސައްކަތް ކުރަމުންނެވެ. މިހެން ކަންތައް ކުރުމުގެ ސަބަބުން ރައްޔިތުންނަށް ހަގީގަތުގައި މި އަންނަ ބަދަލުގެ ނޭގި އޮޅުންތަކެއް އަރަންވަނީ ފަށާފައެވެ.
ނަމަވެސް ހަގީގަތަކީ ހަމަ އަސްލުވެސް މިއީތޯއެވެ؟ މީގެ ޖަވާބު އެންސްޕާގެ ސީއީއޯ ހީނާ ވަލީދު މިވަނީ ދެއްވާފައެވެ.
އެކަން ތަފްސީލީ ގޮތެއްގައި ހިއްސާކުރައްވާ ހީނާ ވިދާޅުވީ އަމިއްލަ އިންޝުއަރެންސެއް އޮންނަނަމަ އެ މީހަކަށް ދެ ގޮތަކުން ރައްކާތެރިކަން ލިބޭ ކަމަށެވެ. އެއީ އަމިއްލަ އިންޝުއަރެންސާއި، އާސަންދަ ސްކީމުން ލިބޭ ކަވަރޭޖް ކަމަށެވެ. ހީނާ ވިދާޅުވީ މިހާރު އޮންނަ އުސޫލުގެ ސަބަބުން އަމިއްލަ އިންޝުއަރެންސްތައް ހުރި ނަމަވެސް ސަރުކާރުގެ އިންޝުއަރެންސް، އާސަންދައިން ވެސް ހޭދަކުރެވޭ ކަމަށެވެ. ނަމަވެސް އުސޫލުތައް އިސްލާހުކުރެވެމުން އެ ކަން ހައްލުވެ، އިސްރާފު ކުޑަވެ، މީހަކަށް އޮންނަ އިންޝުއަރެންސަކީ "ސިންގަލް" އިންޝުއަރެންސް ސްކީމަކަށް ވެގެންދާނެ ކަމަށެވެ.
މިއަދާ ހަމައަށް ވެސް އަމިއްލަ އިންޝުއަރެންސް ޕެކޭޖުތައް ނަގާ ފަރާތްތަކަށް އެ ޕެކޭޖުތަކުގެ ބޭނުން އެންމެ ރަނގަޅު ގޮތުގައި ހިފިފައިނުވާކަން ފާހަގަކުރައްވާ ހީނާ ވިދާޅުވީ ލައްކައިން އަމިއްލަ އިންޝުއަރެންސަށް ޚަރަދުކުރާ އާއިލާތައް ހުރި ނަމަވެސް އަހަރު ނިމޭއިރު، އޭގެ ބޭނުން އެކަށީގެންވާ ގޮތެއްގައި ނުހިފޭ ކަމަށެވެ.
އަމިއްލަ އިންޝުއަރެންސްއިން ކަވަރު ނުކުރާ ހާލަތުގައި އެ ކަމަކަށް އާސަންދަ ލިބޭނެ ކަމުގެ ޔަގީންކަން އެންސްޕާއިން ދޭއިރު މިހާރު ވެސް އަމިއްލަ ކްލިނިކަކަށް، ނުވަތަ ހޮސްޕިޓަލަކަށް ދިއުމުން އަމިއްލަ އިންޝުއަރެންސް އޮތްތޯ ބަލައި ޗެކްކުރެއެވެ. ގެނެވުނު އިސްލާހާއެކު ދެން ޑޮކްޓަރަށް ދައްކަން އަންނަ މީހާއަށް އާސަންދަ ނުވަތަ އަމިއްލަ އިންޝުއަރެންސް ޚިޔާރުކުރުމަށް ފުރުސަތު ލިބިގެންދާނެއެވެ. އޭގެ މާނައަކީ އަމިއްލަ އިންޝުއަރެންސް ޚިޔާރުކޮށްފިނަމަ އާސަންދަ ކަވަރޭޖް ނުލިބުމެވެ. އަދި އާސަންދަ ޚިޔާރުކޮށްފިނަމަ އަމިއްލަ އިންޝުއަރެންސް ބޭނުން ނުކުރެވުމެވެ.
ނަމަވެސް ޕްރައިވެޓް އިންޝުއަރެންސް ބޭނުންކުރާ މީހާ ވިޔަސް އޭނާގެ ޕެކޭޖު ހުސްވާ ހިސާބުން، ނުވަތަ ޕްރައިވެޓް އިންޝުއަރެންސްގެ ޕޮލިސީން ކަވަރު ނުކުރާ ހިސާބުން ނުވަތަ އޭނާ އަތުން ލާރި ނަގައި ބޭސް ސިޓީއަށް ފައިސާދައްކަން ޖެހޭ ހިސާބުން އާސަންދަ ކަވަރޭޖް ލިބޭނެއެވެ.
އެހެންވީމާ މިވާގޮތް ސާފެއް ނޫންތޯއެވެ؟ އާސަންދަ އެއްވެސް ދިވެހި ރައްޔިތަކަށް ނުކެނޑެއެވެ. ސްކީމަށް ގެނައި ބަދަލާއެކު އައި އެންމެ މުހިންމު ބަދަލަކީ އެއްފަހަރާ ދެ އިންޝުއަރެންސް ސްކީމެއް ބޭނުން ނުކުރެވުމެވެ. އިސްރާފު ކުޑަވެގެން ދިއުމެވެ.
