ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހިރާއްޖޭގެ ވެރިކަމާ ހަވާލުވެވަޑައިގެންނެވިއިރު ގޮންޖެހުންތައް ގިނައެވެ. ލިސްޓެއް އެކުލަވާލާނަމަ އެންމެ ކުރީގައި އޮންނާނީ ރާއްޖޭގެ އިގްތިސާދަށް ކުރިމަތިވެފައިވާ މައްސަލަތައް ކަން ޔަގީނެވެ. ޑޮލަރު ލިބުން ތާށިވެ، ރާއްޖެއަށް ދަރަނިތައް ނުދެއްކިދާނެކަމުގެ އިންޒާރު މާލީ ކަންކަން ދިރާސާކުރާ ފަރާތްތަކުން ދިޔައީ ދެމުންނެވެ. މި ސަރުކާރުން ވެރިކަމާ ހަވާލުވުމަށްފަހު އެންމެ ބޮޑު އިސްކަމެއް ދީގެން ކުރަން ފެށީ މިހާރު ވެއްޓިފައި އޮތް އަނދަވަޅުން ނަގައި އަލަށް ކޮޅަށް ޖެހުމުގެ ބުރަ މަސައްކަތެވެ.
ރާއްޖޭގެ އިގްތިސާދުގެ ބޮޑު ބައި ހިއްސާކުރާ ފަތުރުވެރިކަމުން ލިބެންޖެހޭ މިންވަރާ ގާތަށް ވެސް ރާއްޖެއަށް ޑޮލަރު ނުލިބެއެވެ. އިގްތިސާދުގައި ޑޮލަރު ހިފަހައްޓައި މިހާރު އުފެދިފައި އޮތް ޑޮލަރުގެ ކަޅު ބާޒާރު ނައްތާލުމުގެ އުނދަގޫ މަސައްކަތް މިސަރުކާރުން ވަނީ ފަށާފައެވެ. އެގޮތުން، ފަތުރުވެރިކަމުގެ ވިޔަފާރިތަކަށް އާމްދަނީގެ ގޮތުގައި ލިބޭ ޑޮލަރު ރާއްޖޭގެ ބޭންކުތަކަށް މާރުކުރަން ޖެހޭ ގޮތަށް، އަދި ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކުތަކަށް މާރު ކުރަން ޖެހޭ ގޮތަށް ގަވާއިދު އެކުލަވާލާފައިވާއިރު އެއީ ރާއްޖޭގެ ބޭންކިންގެ ނިޒާމަށް ވަންނަ ބޭރު ފައިސާގެ މިންވަރު އިތުރުކުރެވޭނެ މަގެކެވެ.
ފަތުރުވެރިކަމުގެ ސިނާއަތުން އަހަރަކު 6 ބިލިއަން ޑޮލަރުގެ އާމްދަނީ ހޯދުމަކީ މި ސަރުކާރުގެ އަމާޒެކެވެ. އެ ސިނާއަތުގެ ފާއިދާ ރައްޔިތުންގެ ޖީބުތަކަށް އިހުސާސްކޮށްދިނުމުގެ ފޮނި ވައުދާއެކު އައި މި ސަރުކާރުން ވަނީ އެ ސިނާއަތުން ނަގާ ޓެކްސް ވެސް ބޮޑުކޮށްފައެވެ. އެއާޕޯޓުން ނަގާ ޓެކުހާއި، ގްރީން ޓެކްސް އަދި ޓީޖީއެސްޓީ ބޮޑުކުރުމާއެކު ރާއްޖެއަށް ލިބޭ އާމްދަނީ އިތުރުވެގެންދާނެ ކަމަށް ސަރުކާރުން ލަފާކުރެ އެވެ.
ރައީސް މުހައްމަދު މުއިއްޒުގެ އަމާޒަކީ 6 ބިލިއަން ޑޮލަރުގައި މިހާރު އޮތް ރާއްޖޭގެ ޖީޑީޕީ 2028 ގެ ނިޔަލަށް 10 ބިލިއަން ރުފިޔާ އަށް އިތުރުކުރުމެވެ. އެހެންނަމަވެސް ވެރިކަމާ ހަވާލުވެވަޑައިގެންނެވިއިރު ކުރިމަތީގައި އޮތީ އުނދަގޫ ދުވަސްތަކެއްކަން އެމަނިކުފާނަށް އެނގިވަޑައިގަންނަވަ އެވެ.
ކުރީ ސަރުކާރުން އެމަނިކުފާނުގެ ސަރުކާރަށް ވާރުތަވީ 120 ބިލިއަނުން ދަރުވާލާފައިވާ އޮތް އިގްތިސޯދެކެވެ. މިދިޔަ 5 އަހަރު ނިންމާލީ 8 ބިލިއަން ރުފިޔާ ޗާޕުކުރުމަށްފަހު އެވެ. އިގްތިސޯދު އަލުން ކޮޅަށް ޖެހުމުގެ ވައުދާއެކު އައި ރައީސް މުއިއްޒުގެ ސަރުކާރަށް 365 ދުވަސް ވެގެން ދިޔައިރު ވެސް އެ ވައުދު މިގެންދަވަނީ ދަމަހައްޓަވަމުން ނެވެ. ދަރަނި ނަގައިގެން ޑެފިސިޓް ފައިނޭންސް ކުރުމުގެ ބޯދާ ސަގާފަތް މި ސަރުކާރުން މިވަނީ ދޫކޮށްލާފަ އެވެ.
ދައުލަތަށް ނުލިބި ހުރި ފައިސާ ހޯދުމުގެ ވައުދު ވެސް އެމަނިކުފާނު ވެވަޑައިގެންނެވި އެވެ. އެ ވައުދު ފުއްދުމުގެ ވައުދުވެސް ސަރުކާރުގެ ފުރަތަމަ ދުވަސްތަކުގައި ބާރު ސްޕީޑުގައި ކުރިއަށް ގެންގޮސް، މިދިޔަ މަހުގެ 11 ގެ ނިޔަލަށް ސަރުކާރުން މިވަނީ ދައުލަތަށް ނުލިބި ހުރި ފައިސާގެ ތެރެއިން 3.7 ބިލިއަން ރުފިޔާ ހޯއްދަވާފައެވެ. ޒަމާންތަކެއް ވަންދެން ފަރުވާކުޑަކޮށް ކުރެވުނު މަސައްކަތްތައް އެމަނިކުފާނު މި ގެންދަވަނީ ބާރު ސްޕީޑުގައި ކުރިއަށް ގެންދަވަމުން ނެވެ. މި މަސައްކަތުގެ ނަތީޖާއަކީ ރައީސް ޑރ މުއިއްޒު ވިދާޅުވި ގޮތުގައި ދައުލަތުގެ ހަރަދުތައް ފުއްދަން ނަގަންޖެހޭ ދަރަނި މަދުވުމެވެ.
ބިކަވެފައި އޮތް ވިޔަފާރިތަކަށް އަޅާލާ، އަލުން ކޮޅަށް ޖެހުމުގެ އުއްމީދު ވެސް މި ސަރުކާރުން ވަނީ ރައްޔިތުންނަށް ދީފަ އެވެ. ކުދި އަދި މެދު ފަންތީގެ ވިޔަފާރިތަކުގެ ހާލަތު ގޯސްވެގެން ދިޔައީ، ވެސް މިދިޔަ ސަރުކާރުގެ ދޯހަޅި ސިޔާސަތުތަކާއި އެކު އެ ކުންފުނިތަކުން ކުރަމުންދިޔަ މަސައްކަތްތަކަށް ފައިސާ ދެއްކުން ހުއްޓާލުމެވެ. އެ ފައިސާވެސް އަނބުރާ ވިޔަފާރިތަކަށް ރައްދުކުރުމުގެ ވައުދާއެކު އައި މި ސަރުކާރުން ވަނީ 11 ނޮވެމްބަރުގެ ނިޔަލަށް، 6.6 ބިލިއަން ރުފިޔާ ދައްކާފަ އެވެ. މި މަހުގެ ކުރީކޮޅު އެކަނިވެސް 5 މިލިއަނުން ދަށުގެ ބިލުތަކަށް ސަރުކާރުން 501 މިލިއަނަށް ވުރެ ގިނަ ރުފިޔާ ދައްކާފައިވެ އެވެ.
ރައީސް ޑރ މުއިއްޒު ދިވެހި ރައްޔިތުންނަށް ފުރަތަމަ ދުވަހުން ފެށިގެން ވެސް ދެއްވީ، އެމަނިކުފާނުގެ އިގްތިސޯދީ ރީފޯމް އެޖެންޑާ ތަންފީޒުކުރެވިއްޖެ ނަމަ، ގައުމުގެ އިގްތިސޯދު ހަމަ މަގަށް ގެންދެވޭނެ ކަމުގެ ޔަގީންކަމެވެ. އެ އެޖެންޑާ ފުރިހަމަވެ، ކުރެހިގެންދިޔައީ މިދިޔަ މަހު ރައްޔިތުންގެ މަޖިލީހަށް ހުށަހެޅި އަންނަ އަހަރަށް ލަފާކުރާ ދައުލަތުގެ ބަޖެޓުގަ އެވެ. ރައީސްގެ އެންމެ ބޮޑު އަމާޒަކީ ދިވެހިންނަކީ ފުދުންތެރި، ގެދޮރުވެރި ބަޔަކަށް ހެދުމެވެ. ހުއްޓިފައި ހުރި މަޝްރޫއުތަކާ އެކު އާ މަޝްރޫއުތައް ވެސް ކުރިއަށް ގެންދެވޭނެ މަގެއް ހޯދުމެވެ. އެ އަމާޒުގައި ރާއްޖޭގައި މިވަނީ "މޯލްޑިވްސް ޑިވެލޮޕްމެންޓް" ބޭންކެއް ވެސް ހުޅުވާފަ އެވެ. ގެދޮރު ބިނާކުރުމަށްޓަކައި މިވަނީ ފަސޭހަ ހައުސިން ލޯނުތަކަށް ވެސް ހުޅުވާލާފަ އެވެ.
ސަރުކާރުން ކުރަމުން މި ވަނީ ރާއްޖޭގެ އިގްތިސޯދުން ފައިސާ ބޭރުވަމުންދާ މަގުތައް ހޯދައި، އެ މަގުތައް ބަންދުކުރުމުގެ ބުރަ މަސައްކަތް ފަށާފަ އެވެ. ކުރަމުންމިދަނީ ކުރީގެ ގޯސްތައް އިސްލާހުކުރުމުގެ ބުރަ މަސައްކަތެވެ. މި 365 ދުވަހު ކުރެވުނު މަސައްކަތްތަކަށް ބަލާލުމުން ވެސް ރާއްޖޭގެ އިގްތިސޯދު އިހުނަށްވުރެ މާ ރަނގަޅަށްވެސް ކުރިއަރައިގެން ދާނެ ކަމުގެ ޔަޤީންކަން އެބަލިބެއެވެ.
