ރާއްޖޭގައި އާ އެކްސްޕެޓް ސިސްޓަމެއް ޑިވެލޮޕްކުރުމަށްޓަކައި ހަވާލުކުރި މެލޭޝިޔާގެ ބެސްޓިނެޓްއާއެކު މި ސަރުކާރުން ހެދި އެއްބަސްވުމުގެ ދަށުން ދައުލަތަށް އަހަރަކު 900 މިލިއަން ރުފިޔާ ލިބޭނެ ކަމަށް ހޯމްލޭންސް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު މިގޮތަށް ވިދާޅުވީ އިދިކޮޅު އެމްޑީޕީގެ ޕީޖީ ލީޑަރު އިބްރާހީމް ނާޒިލް ކުރެއްވި ސުވާލަކަށް ޖަވާބު ދެއްވަމުން ނެވެ.
ނާޒިލް މިނިސްޓަރާއި ސުވާލުކުރެއްވީ، ރާއްޖޭގައި ވަޒީފާ އަދާކުރާ ބިދޭސީންގެ ކަންކަން ބެލެހެއްޓުމަށް މިހާރު ބޭނުންކުރާ އެކްސްޕެޓް ސިސްޓަމް ދޫކޮށްލައި އާ ސިސްޓަމެއް ޑިވެލޮޕްކުރުމަށްޓަކައި ބެސްޓިނެޓްއާއެކު ވެވުނު އެއްބަސްވުމާ ގުޅިގެން ނެވެ. އެކްސްޕެޓް ސިސްޓަމްގެ މަސައްކަތް 2016 ވަނަ އަހަރުން ފެށިގެން ހަވާލުކޮށްފައިވަނީ އެ ކުންފުންޏާ އެވެ. އެ އެއްބަސްވުމަށް އަމަލުކުރުން ހުއްޓާލީ ނިމިދިޔަ އެމްޑީޕީގެ ސަރުކާރުން ނެވެ.
މެމްބަރުގެ ސުވާލަށް ޖަވާބުދެއްވަމުން ވަޒީރު ވިދާޅުވީ، މި ސަރުކާރުން ވެރިކަމާ ހަވާލުވިއިރު، ކުރީ ސަރުކާރުތަކާއި އެ ކުންފުންޏާ ދެމެދު 8 ސިޓީ ބަދަލު ކުރެވިފައިވާ ކަމަށެވެ. އަދި ހަތަރު ފަހަރެއްގެ މަތިން ގެއްލުމުގެ ބަދަލު ހޯދުމަށް ލޯޔަރުން މެދުވެރިކޮށް ދައުލަތަށް އަންގާފައިވާ ކަމަށެވެ. އަދި އެ ކުންފުންޏަށް ބަދަލު ދޭން ނިންމައި ބަންޑާރަ ނައިބާއި ރައީސް އޮފީހުގެ ސިޓީތަކެއް ފެންނަން އެބަހުރި ކަމަށް ވެސް މިނިސްޓަރު ވިދާޅުވި އެވެ.
"އަޅުގަނޑުމެން ހަވާލުވެގެން ބެލިބެލުމުން ފެނުނީ އޭރުގެ، މިދިޔަ ސަރުކާރުގަ ހުންނެވި އެޓާނީ ޖެނެރަލްގެ ލަފަޔެއް މިކަމަށް ބަދަލު ދިނުމުގެ މަރުހަލާ ފެއްޓުމަށް ކަނޑައަޅުއްވާފަ. ހަމައެއާއެކު އޭރު ރައިސުލްޖުމްހޫރިއްޔާގެ އޮފީހުގެ ސިޓީ ފުޅެއް އެބައޮތް އެކަމާ މެދު ބަދަލު ދިނުމުގެ މަރުހަލާއަކަށް ދާންޖެހިދާނެ ކަމަށް އެގޮތަށް އަމަލު ކުރުމަށް މޯލްޑިވްސް އިމިގްރޭޝަންއާއި އިކޮނޮމިކް މިނިސްޓްރީގެ މައްޗަށް ފޮނުވާފަ." ވަޒީރު ވިދާޅުވި އެވެ.
އެކްސްޕެޓް ސިސްޓަމްގެ މަސައްކަތް ބެސްޓިނެޓާއި މި ސަރުކާރުން ހަވާލުކުރީ "ހަމަ ތަނަކުން ޖެހުނު ކުންފުންޏެއް" ހޯދައިގެން ކަމަށް އިދިކޮޅު ފަރާތްތަކުން ދައްކަމުންދާ ވާހަކަތަކަށް ރައްދުދެއްވަމުން މިނިސްޓަރު ވިދާޅުވީ އެ ކުންފުންޏާއެކު އަލުން އެއްބަސްވުމަކަށް އަންނަން ޖެހުނީ ދައުލަތަށް ނުކަތާ ވަރުގެ ބޮޑު ބަދަލެއް ދެވެން ނެތުމުން ކަމަށެވެ. އެ ކުންފުނިން ގެއްލުމުގެ ބަދަލުގެ ގޮތުގައި ހޯދަން އެދިފައިވަނީ، މިނިސްޓަރު ވިދާޅުވި ގޮތުގައި 15 މިލިއަން ޑޮލަރެވެ.
މިކަން ފާހަގަކުރައްވައި މިނިސްޓަރު ވަނީ ގައުމީ ސަލާމަތާއި ގުޅުންހުރި ކަންކަމުގައި އޮޅޭގޮތަށް މައުލޫމާތު ނުފެތުރުމަށް އިދިކޮޅަށް އިލްތިމާސްކުރައްވާފަ އެވެ.
މީގެއިތުރުން، އާ އެއްބަސްވުން އެކުލަވާލީ ދައުލަތަށް ފައިދާވާ ގޮތަށް ކަމަށް ވެސް މިނިސްޓަރު ވިދާޅުވި އެވެ. އެގޮތުން މިހާރު އެކްސްޕެޓް ސިސްޓަމް މެދުވެރިކޮށް ދައުލަތަށް އަހަރަކު 900 މިލިއަން ރުފިޔާ ލިބިގެންދާނެ ކަމަށް ވިދާޅުވި އެވެ.
މިހާރު އަމަލުކުރި ގޮތުން ތިބޭފުޅުން ރަނގަޅުކޮށްލައްވަންޖެހޭ ކަމެއް، މިހާރު އެ ކުންފުންޏާ އެކު ހެދުނު އެއްބަސްވުމުގެ ދަށުން ކުރީގަ ދައުލަތަށް ވަންނަމުން އައީ 600 މިލިއަން ރުފިޔާ. މިހާރު ވަންނާނެ 900 މިލިއަން ރުފިޔާ މި އެގްރިމެންޓް ހެދިގެން މިއާއެކުގަ މަސައްކަތް ކުރަމުންދަނީ." މިނިސްޓަރު ވިދާޅުވި އެވެ.
އެކްސްޕެޓް ސިސްޓަމެއް ޑިވެލޮޕްކުރުމަށްޓަކައި އެންމެ ފުރަތަމަ އެ ކުންފުންޏާ އެކު އެއްބަސްވުމެއްގައި ސޮއިކުރެވުނީ ކުރީގެ ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރެވެ. ބަންގްލަދޭޝް އިން ބިދޭސީން ގެނައުން މަޑުޖައްސާލުމަށް ނިމިދިޔަ އެމްޑީޕީގެ ސަރުކާރުން 2019 ވަނަ އަހަރު ނިންމުމާ އެކު އެ އެއްބަސްވުމަށް އަމަލުކުރުން އޮތީ ހުއްޓިފަ އެވެ.
އެ އެއްބަސްވުމަށް އަމަލުކުރުން ހުއްޓާލުމަށް ސަރުކާރުން ނިންމީ، އެ ކުންފުންޏާ އެކު އެއްވެސް މަޝްވަރާއެއް ނުކޮށެވެ. އެހެންވެ، ދެން އަމަލުކުރަންޖެހޭ ގޮތެއް ހޯދަން އެ ކުންފުނިން ވަކީލުން މެދުވެރިކޮށް ލިޔެކިޔުންތައް ބަދަލުވެސްކޮށްފައިވެ އެވެ. އެ އެއްބަސްވުމަށް އަމަލުކުރުން ހުއްޓާލުމާ ގުޅިގެން އެ ކުންފުނިން ދައުލަތަށް ދެގޮތެއް ހުށަހެޅި އެވެ. ފުރަތަމަ ހުށަހެޅުމަކީ އެ ކުންފުންޏަށް ލިބުނު ގެއްލުމުގެ ބަދަލު ދިނުމެވެ. ނުވަތަ މިހާރު ބޭނުންކުރާ އެކްސްޕެޓް ސިސްޓަމަށް ވުރެ މާ ހަރުދަނާ ސިސްޓަމެއް ގާއިމުކުރުމަށް އެ ކުންފުންޏަށް އަލުން ހަވާލުކުރުމެވެ.
އެ ކުންފުންޏަށް ބަދަލު ދެވެން ނެތުމުން ރައިސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވެރިކަމާ ހަވާލުވެ ނިންމެވީ، އާ ސިސްޓަމެއް ޑިވެލޮޕްކުރަން އެ ކުންފުންޏާ ހަވާލުކުރުމަށެވެ.
