މިހާރު ކުރިއަށްދާ ބްރޯޑްކާސްޓް ކަޕް 2024 ގައި ސެމީ ފައިނަލްގެ ދެވަނަ މެޗްގައި އަސްލު ޓީވީ އެފްސީއާއި އައިސް ޓީވީ ބައްދަލުކުރި މެޗުން ނާކާމިޔާބުވެ އަސްލު ޓީވީ އެފްސީއަށް މުބާރާތް ނިމިއްޖެއެވެ.
ވާދަވެރި ކުޅުމެއް ފެނިގެން ދިޔަ މިމެޗުގައި، ފުރަތަމަ ލީޑު ނެގީވެސް އައިސް ޓީވީންނެވެ. ނަމަވެސް، އަސްލު ޓީވީ އެފްސީން ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. އައިސް ޓީވީގެ ޓީމުން ޑިފެންސިވް ކުޅުމެއް ފެނިގެންދިޔަ މިމެޗުގައި، އަސްލު ޓީވީން ވަނީ ބާރު ހަމަލާތަކެއް އުފައްދާފައެވެ.
ލީޑު ނެގުމަށް ރަނގަޅު ފުރުސަތުތަކެއް ލިބުނު ނަމަވެސް، ފެނިގެންދިޔައީ ބޭކާރުވެގެންދިޔަ ތަނެވެ. މިމެޗުގައި، ދެވަނަ ފަހަރަށް ލީޑު ނަގައި، އައިސް ޓީވީން ވަނީ މެޗުގައި ކުޅުން ވަރުގަދަކޮށްފައެވެ.
ނަމަވެސް، އަސްލު ޓީވީ އެފްސީގެ ފަރާތުން ފެނުނު ރަނގަޅު ކުޅުމާއެކު، ލީޑު ނެގުމަށް ފުރުސަތުތައް ފަހިކުރިއެވެ. ދެވަނަ ފަހަރަށް ލީޑު ނަގަން މަސައްކަތް ކުރަނިކޮށް، އައިސް ޓީވީން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. އެ ޓީމުން ވަނީ މެޗުގައި، އިތުރު ދެ ލަނޑު ޖަހާފައެވެ.
އަސްލު ޓީވީ އެފްސީން މެޗު ނިންމާލީ އިތުރު ލަނޑަކާއެކުއެވެ. މެޗު ނިމުނީ 5.2ގެ ނަތީޖާއަކުން އައިސް ޓީވީ މޮޅުވެގެންނެވެ.
ފައިނަލަށް ދަތުރުނުކުރި ކަމުގައި ވިޔަސް އަސްލު ޓީވީ އެފްސީން ވަނީ މިމުބާރާތުގައި ރަނގަޅު ކުޅުމެއް ދައްކާފައެވެ. ހާއްސަ ގޮތެއްގައި މިމުބާރާތުގައި ފުރަތަމަ ކުޅުނު ދެ މެޗުން ދެއްކި ކުޅުމާއެކު ގިނަ ބައެއްގެ ސަމާލުކަން ޓީމަށް ލިބުނެއެވެ. އަދި މުބާރާތަށް ތައްޔާރުވި ގޮތާއި ސަޕޯޓަރުންގެ ފަރާތުން ފެނުނު އާދަޔާ ޚިލާފު ފޯރިއާއެކު ގިނަ ބައެއްގެ ފެވަރިޓަކަށް މިމުބާރާތުގައި އަސްލު ޓީވީ އެފްސީ ވަނީ ވެފައެވެ.
އަސްލު ޓީވީން މިމުބާރާތުގައި އެންމެ ފުރަތަމަ ކުޅުނީ ބްރޯޑްކޮމްގެ ޓީމާއެކުއެވެ. މިމެޗުގައި ފަސޭހަ ކަމާއެކު 10-0 ގެ ނަތީޖާއަކުން ކުރި ހޯދައި އަސްލު ޓީވީ އެފްސީން ވަނީ މުބާރާތުގެ ފެށުން ރަނގަޅު ކޮށްފައެވެ. އަދި މުބާރާތުގައި ކުޅުނު ދެވަނަ މެޗު 3-0 ގެ ނަތީޖާއަކުން ވަގުތު ޕްލަސް ބަލިކޮށް، އަސްލު ޓީވީ އެފްސީ ވަނީ އަސްލު ޓީވީ ހިމެނޭ ގްރޫޕުން ސެމީގެ ޖާގަ ކަށަވަރު ކުރި ފުރަތަމަ ޓީމަށް ވެފައެވެ. މިމުބާރާތުގެ ގްރޫޕް ސްޓޭޖްގައި އަސްލު ޓީވީން ކުޅުނު ފަހު މެޗުގައި ޕީއެސްއެމް ނިއުސް އަތުން ހަނި ތަފާތަކުން ބަލިވިއެވެ.
އޮކްޓޫބަރުމަހުގެ 11 އިން 12 އަށް ދެ ދުވަހުގެ މުއްދަތަކަށް ކުރިއަށްގެންދާ މިމުބާރާތުގައި އަސްލު ޓީވީ ތަމްސީލުކުރި ޓީމުން ދެއްކީ ތަފާތު މޮޅު ކުޅުމެއް ކަމަށް އިންތިޒާމުކުރި ފަރާތުންވެސް ފާހަގަކުރެއެވެ.
އެންމެ ގިނަ ލަނޑު ޖެހި ކުޅުންތެރިންގެ ތެރޭގައި އަސްލު ޓީވީގެ ލައިިޒާން އަދި ސިނާން ހިމެނުމަކީ މިމުބާރާތުގައި އަސްލު ޓީވީ އެފްސީގެ މޮޅުކަން ހާމަވާ އެއް ސަބަބެވެ.
މި މުބާރާތް ކުޅެނީ ހުޅުމާލޭ ފޭސް 2 ގެ ފުޓްސަލް ދަނޑުގައެވެ. މުބާރާތުގެ ފައިނަލް މެޗުގައި މިރޭ ބައްދަލުކުރާނީ އައިސް ޓީވީއާއި ޕީއެސްއެމްނިއުސްއެވެ.
މިއީ ރާއްޖޭގެ މީޑިއާ ދާއިރާގައި ހަރަކާތްރެރިވާ ބްރޯޑްކާސްޓަރުންނާއި އިތުރަށް ގުޅުން ބަދަހިކޮށް ހަރުދަނާކުރުމުގެ މަގްސަދުގައި ބާއްވާ މުބާރާތެކެވެ.
ބްރޯޑްކާސްޓިން ދުވަސް ފާހަގަކުރުމަށް ބްރޯޑްކާސްޓިންގ ކޮމިޝަނުން ސިލްސިލާކޮށް ބާއްވަމުން އަންނަ ބްރޯޑްކާސްޓް ކަޕްގެ މިއަހަރުގެ މުބާރާތުގައި އަސްލު ޓީވީގެ އިތުރުން ބައިވެރިވީ، ބްރޯޑްކޮމް، ވަގުތު ޓީވީ، ވީޓީވީ، އެސްއެސް ޓީވީ، ޕީއެސްއެމް ނިއުސް، ޓީވީއެމް އަދި އައިސް ޓީވީއެވެ.
ބްރޯޑްކާސްޓް ކަޕަކީ އަސްލު ޓީވީ ބައިވެރިވި މިފަދަ ފުރަތަމަ މުބާރާތެވެ.
