ގދ. ތިނަދޫ އަދި ރ.އަލިފުށިން 60 މުވައްޒަފަކު ކަނޑާލިކަމަށް ބުނާ ވާހަކަތައް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ދޮގުކޮށްފިއެވެ.
އެ ކުންފުނީގެ މުވައްޒަފުން ކަނޑާލިކަމަށްބުނާ މައްސަލައިގައި އާރްޑީސީގެ މީޑިއާ އޮފިޝަލް އަސްލު ޓީވީއަށް މައުލޫމާތު ދެއްވަމުން ވިދާޅުވީ ތިނަދޫ މަގުހެދުމުގެ ދެވަނަ ފިޔަވަހީގެ މަސައްކަތް ޖުލައިމަހު ނިމިފައިވާ ކަމަށެވެ. މަސައްކަތް ނިމުމުން އެ މަސައްކަތަށް ކޮންޓްރެކްޓް އުސޫލުން ނެގި މުވައްޒަފުން ދޫކޮށްލާފައިވާކަމަށް އާރްޑީސީން މައުލޫމާތު ދިނެވެ.
އަލިފުށީގެ ހާލަތާ ގުޅިގެން މީޑިއާ އޮފިޝަލް ވިދާޅުވީ އެ ރަށުގެ މަގުހެދުމުގެ މަސައްކަތް މަޑުޖެހިފައިވާ ކަމަށާއި ވުމާއެކު އެ ރަށުގައި ހަރަކާތްތެރިވި މުވައްޒަފުންނަށް ސައިޓު ބަދަލުކުރުމަށް ފުރުސަތު ދީފައިވާ ކަމަށެވެ.
އެ ފުރުސަތުގެ ދަށުން ބައެއް ޓެކްނިކަލް މުވައްޒަފުންނާއި އިންޖިނިއަރިން މުވައްޒަފުން ސައިޓު ބަދަލުކޮށްފައިވާ ކަމަށާއި ބާކީ ތިބި މުވައްޒަފުން ދޫކޮށްލީ އެކަށީގެންވާ ބާރުމިނުގައި މަސައްކަތް ނުދާތީ އިތުރަށް ދައުލަތުގެ މާލިއްޔަތަށް ބުރަބޮޑު ނުކުރަން ކަމަށް އާރްޑީސީން ބުނެއެވެ.
މިކަމާ ގުޅިގެން އާރްޑީސީގެ ބަހެއް ހޯދުމަކާ ނުލައި އިދިކޮޅު އެމްޑީޕީން ސަރުކާރަށް ފާޑުކިޔަމުން އަންނައިރު މިފަހުން ފެނަަކައިންވެސް މުވައްޒަފުންތަކެއް ކަނޑާލިކަމަށް އަޑުފެތުރިއެވެ.
ނަމަވެސް ކުންފުނި ނަގާ ކޮޅަށްޖެހުމަށް ކުރާ މަސައްކަތުގެ ދަށުން ކޮންޓްރެކްޓް މުވައްޒަފުންގެ މުއްދަތު ހަމަވުމުން އަލުން ކޮންޓްރެކް އައު ނުކޮށް ދޫކޮށްލާފައިވާ ކަމަށާއި އުސޫލުން ބޭރުން ކުންފުނީގެ އެއްވެސް މުވައްޒަފަކު ނުކަނޑާނެކަމުގެ ޔަގީންކަން ފެނަކައިންވެސް އޭރު ދީފައިވެއެވެ.
ފަހަކަށް އައިސް އިދިކޮޅު ފަރާތްތަކުން އަންނަނީ ސަަރުކާރުގެ އަގު ވައްޓާލުމަށް ގިނަ ވާހަކަތަކެއް ދައްކަމުންނެވެ.
