މޫސުމީ ބަދަލުތަކުގެ ސަބަބުން ދިމާވާ ކާރިސާތަކުން ރައްކާތެރިކަން ހޯދުމަށް ފިޔަވަޅު އެޅުމަށާއި ކާބޯތަކެތީގެ ނިޒާމުގެ ދެމެހެއްޓެނިވިކަން ކަށަވަރު ކުރުމަށް އޭޝިއަން ޑިވެލޮޕްމަންޓް ބޭންކް (އޭޑީބީ) އިން 21.95 މިލިއަން ޑޮލަރުގެ ފައިނޭންސިން ޕެކޭޖެއް ހަމަޖައްސައިފިއެވެ.
އޭޝިއަން ޑިވެލޮޕްމަންޓް ފަންޑުން ބުނީ މި ޕެކޭޖަކީ ހަތަރު މިލިއަން ޑޮލަރުގެ ކޮންސެޝަނަލް ލޯނަކާއި 17.95 މިލިއަން ޑޮލަރުގެ ހިލޭ އެހީ ކަމަށެވެ.
އެންހޭންސިން ކްލައިމެޓް ރެޒިލިއަންސް އެންޑް ފުޑް ސެކިއުރިޓީ ޕްރޮޖެކްޓްގެ ދަށުން އައްޑޫ ސިޓީ އާއި މާލޭގެ އާލީ ވޯނިން ސިސްޓަމްތައް އަޕްގްރޭޑްކޮށް ކާރިސާތަކާއި މޫސުމަށް އަންނަ ބަދަލުތަކަށް ރާއްޖޭގެ ރެޒިލިއަންސް ހަރުދަނާވެގެންދާނެ ކަން ފާހަކޮށް އޭޑީބީން ބުނީ މި ފިޔަވަޅުތަކުގެ ސަބަބުން މޯލްޑިވްސް މީޓިއޮރޮލޮޖިކަލް ސަރވިސްއަށް ރިއަލް ޓައިމް މޫސުން މޮނިޓަރކުރުމާއި، އާރލީ ވޯނިންގ ސިސްޓަމެއް ޤާއިމުކުރެވޭނެ ކަމަށެވެ. އެގޮތުން މޫސުމަށް އަންނަ ބަދަލުތަކާ ގުޅިގެން އަޅާފައިވާ ފިޔަވަޅުތަކާއި ކާރިސާތަކަށް ތައްޔާރުވުމާއި އިޖާބަ ދިނުމާ ބެހޭ ގޮތުން ކޮމިއުނިޓީ ޓްރެއިނިން އާއި ހޭލުންތެރިކަން އިތުރުކުރެވިގެންދާނެ ކަމަށް ވެސް ފާހަގަކޮށްފައިވެއެވެ.
އޭޑީބީން ބުނީ މި މަޝްރޫޢުގެ ސަބަބުން އުތުރު ސަރަޙައްދުގެ އެންމެ އާބާދީ ބޮޑު ކުޅުދުއްފުށީ ގައި ފެންބޮޑުވުމުގެ މައްސަލަ ހައްލުކުރުމަށް ސްޓޯމްވޯޓަރ ޑްރެއިނޭޖް އެންޑް ފިލްޓްރޭޝަން ސިސްޓަމްތައް ޤާއިމުކުރުމާއި، މެންގްރޫވް ސަރަޙައްދުތައް އަލުން އިއާދަކޮށް، ގުދުރަތީ ގޮތުން އެހެނިހެން ޙައްލުތައް ތަޢާރަފްކުރުމަށް މަގުފަހިވެގެންދާނެ ކަމަށެވެ. އަދި ގޮނޑުދޮށް ހިމާޔަތްކުރުމަށްޓަކައި އާޓިފިޝަލް ރީފްސް، ބާމްސް އަދި ގްރޮއިންސް ފަދަ އޮފްޝޯ އަދި ނިއާޝޯރ އިންފްރާސްޓްރަކްޗަރތައް އެޅުމަށް ހަމަޖެހިފައިވާ ކަން ވެސް އޭޑީބީން ފާހަގަކުރެއެވެ.
މީގެ އިތުރުން މި އެހީ މެދުވެރިކޮށް ކާބޯތަކެތީގެ ނިޒާމުގެ ދެމެހެއްޓެނިކަން ހޯދުމަށް ކްލައިމެޓް ސްމާޓް އަރބަން ޕާމިންގެ ވަސީލަތްތައް ރާއްޖެއަށް ތަޢާރަފްކޮށް އެ ވަސީލަތްތައް ބޭނުންކުރާނެގޮތް ހއ. އަތޮޅާއި އައްޑޫ ސިޓީގެ ރައްޔިތުންނަށް ދަސްކޮށްދެވިގެންދާނެއެވެ. އަދި ހދ. ހަނިމާދޫ އެގްރިކަލްޗަރ ސެންޓަރުގައި ދިރާސާ ކުރެވޭނެ މަލްޓިޕަރޕަސް ފެލިޓީއެއް ޤާއިމުކުރުމަށްވެސް ހަމަޖެހިފައިވާކަމަށް އޭޑީބީން ބުނެއެވެ.
