މުސާރަ ކުޑަކޮށްފިނަމަ، އިންތިޚާބުވުމަށް މެންބަރުން ނެގި ދަރަނި އަދާކުރާނެ ގޮތެއް ނޯންނާނެ: ފަލާހު

ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކޮށްފިނަމަ، އިިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާޙް ވިދާޅުވެއްޖެއެވެ.

މެމްބަރު ފަލާޙް މިފަދައިން ވިދާޅުވީ، ރައްޔިތުންގެ މަޖިލީހުގެ މެންބަރުންގެ މުސާރައާއި ބައެއް އިނާޔަތްތައް ކުޑަކުރުމަށް ގޮވާލައި ސޮއިކުރަން ފެށި އޮންލައިން ޕެޓިޝަނާ ގުޅިގެންނެވެ.

އެކްސްގައި ކުރެއްވި ޕޯސްޓެއްގައި ފަލާހު ވިދާޅުވެފައި ވަނީ ، މުސާރަ ކުޑަކުރުމަކީ ގޯސް ޚިޔާލެއް ނޫން ކަމަށެވެ. ނަމަވެސް، 19 ވަނަ މަޖިލީހުގައި އެމްޑީޕީގެ ސުޕަ މެޖޯރިޓީ އޮތްއިރު، މެންބަރެއްގެ މުސާރަ 100،000 ރުފިޔާއަށް އިތުރުކުރުމަށް ކޮމިޓީން ފާސްކުރިކަމަށާއި، އެހެންނަމަވެސް މިހާރުގެ ރައީސް ޑރ. މުޙައްމަދު މުއިއްޒުގެ އިރުޝާދާ އެކު އެކަން ނުކުރަން ނިންމިކަމަށް ވިދާޅުވިއެވެ.

މެންބަރު ފަލާހު އިތުރަށް ވިދާޅުވީ، ދައުރެއްގެ މެދުތެރެއިން މުސާރަ ކުޑަކުރުމަށް ވުރެ ރަނގަޅީ އައު ދައުރެއް ފެށުމުގެ ކުރިން މުސާރަ ކުޑަކުރުން ކަމަށެވެ. މިގޮތުން، 21 ވަނަ މަޖިލީހަށް މެންބަރަކަށް 5000 ރުފިޔާ ކަނޑައަޅައިފިނަމަ، އެ މުސާރައަށް އެއްބަސްވެގެން ކުރިމަތިލާ މެންބަރުންނަށް ޝަކުވާކުރެވޭނެ ޖާގައެއް ނޯންނާނެ ކަން މެމްބަރު ފާހަގަކުރެއްވިއެވެ.

ފަލާހު ވިދާޅުވެފައި ވަނީ މަޖިލިސް އިންތިޚާބުގެ ކެމްޕޭނަށް މެންބަރުން ޚަރަދު ކުރާނީ އަދި ދަރަނި ނަގާނީ ލިބޭނެ ކަމަށް ބެލެވޭ މުސާރައަށް ބަލައިގެން ކަމަށެވެ. މިގޮތުން، އެތައް މިލިއަން ރުފިޔާ ޚަރަދުކޮށް މަޖިލީހަށް ވަންނަ ތަނުން މުސާރަ ކުޑަކޮށްލުމުން އިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް މެމްބަރު ވަނީ ވިދާޅުވެފައެވެ.

މަޖިލިސް މެންބަރުންގެ އިނާޔަތްތަކުގެ އިތުރުން ކުރީގެ ރައީސުންނަށާއި ފަނޑިޔާރުންނަށް ދެވޭ އިނާޔަތްތައްވެސް ޕެޓިޝަނުގައި ހިމެނޭ ނަމަ ވަރަށް ރަނގަޅުވީސް ކަމަށް ފަލާހު ވަނީ ވިދާޅުވެފައެވެ.

" ހަމަ އެއާއިއެކު ކުރީގެ ރަޢީސުންގެ އިނާުަޔަތާމެދުވެސް ވިސްނާލުން މުހިއްމު ފަނޑިޔާރުންގެ ނަންވެސް ޕެޓިޝަނުގަ ޖަހާލިނަމަ ސަޅިވިސް" މެމްބަރު ފަލާޙް

އޭނާ ވިދާޅުވި ގޮތުގައި ރައީސް މުޢިއްޒު މުސާރައިގެ ދެބައިކުޅަ އެއްބައި ނަންގަވާ، ކޮންމެ ކަމެއްގައިވެސް ނަމޫނާ ދައްކަވައެވެ. އެހެންކަމުން ފަލާހު ވަނީ ރައީސްއަށް ޝުކުރު ދަންނަވާފައެވެ.