"ފަތުވާ މަހާސިންތާ" ގެ ނަމުގައި ދިވެހިރާއްޖޭގެ ދީނީ އިލްމުވެރިންނާއި އިމާމުންނަށް އަމާޒުކޮށްގެން ފުރަތަމަ ފަހަރަށް ފަތުވާ މަހާސިންތާއެއް ފަށައިފިއެވެ. މިއީ އިސްލާމީ ފަތުވާދޭ އެންމެ މަތީ މަޖިލީހާއި އިސްލާމީ ކަންތައްތަކާ ބެހޭ ވުޒާރާ ގުޅިގެން ފަށާފައިވާ މަހާސިންތާއެކެވެ.
މިއީ މިހާތަނަށް ރާއްޖޭގައި ބާއްވާ މިފަދަ ފުރަތަމަ މަހާސިންތާއެވެ.
އިސްލާމިކް ވުޒާރާއިން މި މަހާސިންތާގެ މައުޟޫއަކަށް ކަނޑައަޅާފައިވަނީ " މުޖުތަމައު އިސްލާހު ކުރުމުގައި ފަތުވާގެ ދައުރު" އެވެ. މި މަހާސިންތާގެ މަގްސަދަކީ ދިވެހިރާއްޖޭގައި ދީނީ އެއްބައިވަންތަކަން ހިމާޔަތްކުރުމާއި އިސްލާމްދީނުގެ މަތިވެރިވި ދަންމަރު ފެތުރުމަށް މަސައްކަތްކުރައްވާ ފަރާތްތައް އެއްތަނަކުން ބައްދަލުވެ މަޝްވަރާކޮށް ހިޔާލު ބަދަލުކުރުމުގެ ފުރުސަތު ހޯދައިދިނުން ކަމަށް އިސްލާމިކް ވުޒާރާއިން ވިދާޅުވެފައިވެއެވެ.
އަދި ރާއްޖޭގައި ދީނީގޮތުން ހިޔާލުތަފާތުވާ މައްސަލަތައް ދެނެގަތުމާއި، މުޖުތަމައުގެ މަސްލަހަތު ހިމެނޭ ދީނުގެ އެކިއެކި މައްސަލަތަކުގައި ހިޔާލު ހޯދާ މަޝްވަރާކުރުން ވެސް ހިމެނޭނެކަން ފާހަގަކޮށްފައިވެއެވެ. އެކަންކަމުގައި ގުޅުންހުރި ފަރާތްތައް އެކުގައި މަސައްކަތްކޮށް މުޖުތަމައު އިސްލާހު ކުރުމުގައި ރޭވުންތެރިކަމާއެކު ރަނގަޅު ނަތީޖާތަކެއް ނެރެވޭނެ ގޮތްތައް ދެނެގަތުމަކީ މަގްސަދެއްކަމަށް އެ ވުޒާރާއިން ވިދާޅުވިއެވެ.
އިސްލާމީ ކަންތައްތަކާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދު މަހާސިންތާ ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވިދާޅުވީ ރާއްޖޭގެ ފަތުވާގެ ނިޒާމު ހަރުދަނާކުރުމަކީ ސަރުކާރުގެ ސިޔާސަތެއްކަމަށެވެ. އަދި ދީނީ އެއްބައިވަންތަކަން ގާއިމުކުރެއްވުމަށް ރައީސް މުޢިއްޒު އިސްކަމެއް ދެއްވާކަމަށާއި ގިނަ ދުވަސްތަކަކަށް ފަތުވާ ކައުންސިލްގެ މެންބަރުން ހަމަނުވެ އޮތް އޮތުން ރައީސް ވަނީ ނިމުމަކަށް ގެންނަވައި، ގާނޫނުގައި ބުނާ ފުރިހަމަ އަދަދަށް މެންބަރުން އައްޔަންކުރެއްވިފައި ކަމަށެވެ.
އަދި އިސްލާމީ ކަންކަން ހިންގުމުގައި އިލްމުވެރިން ދެއްވާ ލަފާފުޅުތަކަށް އަބަދުވެސް އިޙުތިރާމްކުރާނެކަމުގެ ޔަގީންކަން ވަޒީރު ދެއްވާފައިވެއެވެ.
