ސެމްސަންގް އިލެކްޓްރޯނިކްސްގެ ކޯސީއީއޯ މަރުވެއްޖެ

ދެކުނު ކޮރެއާގެ އިލެކްޓްރޯނިކް ކުންފުނި ސެމްސަންގުގެ ޓެލެވިޜަން ވިޔަފާރި ދުނިޔޭގައި ލީޑަރެއްގެ ގޮތުގައި ޤާއިމުކޮށްދިން އެކުންފުނީގެ އެއް ކޯ ޗީފް އެކްސެކެޓިވް އޮފިސަރ ހެން ޖޮންހް-ހީ ހާޓް އެޓޭކެއް ޖެހިގެން މަރުވެއްޖެއެވެ.

ސެމްސަންގްގެ ސްޕޯކްސްޕާރސަން ރޮއިޓަރސް އަށް ދިން އިންޓަވިއުއެއްގައި ބުނީ އުމުރުން 63 އަހަރުގައި ހެން މަރުވީ ހާޓް އެޓޭކެއް ޖެހިގެން މިއަދު ކަމަށެވެ.

ސެމްސަންގާ 1988 ވަނަ އަހަރު ގުޅުނު ހެން އަކީ އެ ކުންފުނީގެ މަތީ ފެންވަރުގެ ޓީވީ ސެޓްތައް ދުނިޔޭގެ އެކި ކަންކޮޅުތަކުގައި މަގޫބޫލު އެއްޗަކަށް ހެދުމުގައި އިސް ދައުރެއް އަދާކުރި މީހެކެވެ. ހެންވަނީ އެ ކުންފުނީގެ އިނޮވޭޝަނާއި މާކެޓް ޕްރެޒެންސަށް އެހީތެރިކަން ފޯރުކޮށްދިނުމުގައި މުހިންމު ދައުރެއް އަދާކޮށްފައެވެ.

އުމުރުން 63 އަހަރުގެ ހެން އަކީ 2022 ވަނަ އަހަރު ދެކުނު ކޮރެއާގެ އެންމެ ބޮޑު ކުންފުނީގެ ޗީފް އެގްޒެކެޓިވް އޮފިސަރުގެ މަޤާމަށް އައިއިރު، އެ ކުންފުނީގެ ކޮންސިއުމާ އިލެކްޓްރޯނިކްސް އެންޑް މޮބައިލް ޑިވައިސް ޑިވިޝަން ހިންގުމާ ވެސް ހަވާލުވެ ހުރި މީހާއެވެ.

ސީއެލްއެސްއޭ ސެކިއުރިޓީޒް ކޮރެއާގެ އެނަލިސްޓެއް ކަމަށްވާ ސަންޖީވް ރަނާ ބުނި ގޮތުގައި ކޮންސިއުމާ އިލެކްޓްރޯނިކްސް ވިޔަފާރީގައި އޭނާގެ ހިއްސާ މާ ބޮޑުކޮށް ނުބުނެވޭނެ ކަމަށްވެއެވެ. އޭނާގެ އިސްނެގުމުގެ ދަށުން ސެމްސަންގްގެ ޓީވީ ވިޔަފާރި ޚާއްސަކޮށް ފާއިތުވި ދެ އަހަރު ދުވަހުގެ ތެރޭގައި ވަރަށް ވަރުގަދަ މާކެޓް ޕޮޒިޝަނެއް ދަމަހައްޓާފައިވެއެވެ.

ހެންގެ އަމިއްލަ މޮޓޯއަކީ "ދާއިމީ ނަމްބަރު 1"އެކެވެ. އޭނާ މަޝްހޫރުވެފައިވަނީ ސެމްސަންގްގެ ސަގާފަތް ރަމްޒުކޮށްދޭ ގޮންޖެހުންތަކުން އަރައިގަތުމުގެ ހަރުދަނާ އަހުލާގާއި އަޒުމުގެ ސަބަބުންނެވެ.

ހެން މަރުވުމާއި ގުޅިގެން މިހާރު ވަނީ އެ މަޤާމަށް ބޮސް ޖޫން ޔަންގް-ހިއުން އައްޔަންކޮށްފައެވެ. ބެލެވޭ ގޮތުގައި ބޮސް ޖޫން އައްޔަން ކުރީ ކުންފުނީގެ އަންޑަޕާފޯމިން ޗިޕް ވިޔަފާރި ބަދަލުކޮށް، ވިޔަފާރީގެ ނުތަނަވަސްކަން ނައްތާލުމަށެވެ.

ސެމްސަންގް އިލެކްޓްރޯނިކްސް އަކީ ދެކުނު ކޮރެއާގެ މަޝްހޫރު ސެމްސަންގް ގްރޫޕްގެ ފްލެގްޝިޕް ސަބްސިޑަރީ ކުންފުންޏެވެ. އެ ކުންފުނީގެ ބާރު ގަދަ ސެމްސަންގް އާއިލާގައި ހެން އެއް ނުހިމެނެއެވެ.